Manipur violence منی پور میں انٹرنیٹ بند کرنے سے متعلق عرضی مسترد

یہ عرضی منی پور کے چونگتھم وکٹر سنگھ اور مائینگ بام جیمز کی جانب سے دائر کی گئی تھی۔ بنچ نے ان کی طرف سے پیش ہونے والے ایڈوکیٹ شادان فراست سے پوچھا کہ وہ ہائی کورٹ سے رجوع کیوں نہیں کرتے، جہاں ایک ڈویژن بنچ اس معاملے پر غور کر رہی ہے۔

نئی دہلی: سپریم کورٹ نے ذات پات کے تشدد سے متاثرہ منی پور میں 3 مئی سے انٹرنیٹ سروس کو عارضی طور پر بند کرنے کے خلاف دائر عرضی کو آج مسترد کردیا۔ چیف جسٹس ڈی وائی چندر چوڑ اور جسٹس پی ایس نرسمہا اور منوج مشرا پر مشتمل بنچ نے اس عرضی پر غور کرنے سے یہ کہتے ہوئے انکار کر دیا کہ اس معاملے پر ہائی کورٹ پہلے ہی غور کر رہا ہے۔ یہ عرضی منی پور کے چونگتھم وکٹر سنگھ اور مائینگ بام جیمز کی جانب سے دائر کی گئی تھی۔ بنچ نے ان کی طرف سے پیش ہونے والے ایڈوکیٹ شادان فراست سے پوچھا کہ وہ ہائی کورٹ سے رجوع کیوں نہیں کرتے، جہاں ایک ڈویژن بنچ اس معاملے پر غور کر رہی ہے۔

بنچ نے کہا کہ جیسے ہی وہ اس معاملے میں نوٹس جاری کرے گی، ہائی کورٹ اس معاملے کی سماعت بند کر دے گا۔ درخواست میں دلیل دی گئی کہ انٹرنیٹ کو بند کرنا کسی بھی طرح سے مناسب نہیں ہے، کیونکہ اس سے شہریوں کے آئینی آزادی اظہار رائے اور کسی بھی تجارت یا کاروبار کو جاری رکھنے کا حق متاثر ہوتا ہے۔ اس سے قبل منی پور تشدد سے متعلق ایک معاملے میں تین جولائی کو سماعت کے بعد سپریم کورٹ نے ریاستی حکومت سے تفصیلی اسٹیٹس رپورٹ طلب کی تھی۔

یو این آئی