اتر پردیش کے ضلع جونپور میں دو حقیقی بھائیوں میں راستہ کی زمین کو لےکر آپس میں جھگڑا ہوا اور معاملہ اتنا بڑھ گیا کہ چھوٹے بھائی نے بڑے بھائی کو پیٹ پیٹ کر ہلاک کر دیا، مقتول کی بیوی، بیٹی اور بہو کو بھی شدید زخمی کردیا۔
نوادہ گاؤں میں لال جی اور اس کے چھوٹے بھائی رامجیت کے درمیان راستہ کو لےکر کافی دنوں سے جھگڑا چل رہا تھا۔ آج صبح راستے سے لال جی کے خاندان کے افراد جارہے تھے کہ رامجیت یادو اور اس کے خاندان کے افراد نے لاٹھیوں اور تیز دھار ہتھیاروں سے حملہ کردیا جس کی وجہ سے لال جی یادو 55 سالہ کی موقع پر ہی موت ہوگئی۔
لال جی یادو کی بیوی پرمیلا، بیٹا جتیندر، بیٹی سونم اور بہو سنیتا بچانے کے لیے آگے بڑھیں تو انہیں بھی مار پیٹ کرکے بری طرح زخمی کردیا گیا۔ مقامی لوگوں نے زخمیوں کو پہلے ابتدائی صحت مرکز کرنجا کلاں پہنچایا۔ جہاں ڈاکٹروں نے حالت نازک دیکھتے ہوئے تمام زخمیوں کو ضلع اسپتال ریفر کردیا۔
موت کی اطلاع ملتے ہی پولیس فورس گاؤں پہنچی اور لاش کرنجا کلاں اسپتال پہونچایا وہیں پر پنچ نامے کی کارروائی مکمل کرنے کے بعد اسے پوسٹ مارٹم کے لیے بھیج دیا، اس سلسلہ میں پولیس نے 3 افراد کو حراست میں لے لیا ہے۔
