نئی دہلی: ڈاکٹر جے شنکر نے آج فجی کے وزیر اعظم سیتوینی رابوکا کے ساتھ دو طرفہ میٹنگ کی۔ ملاقات میں دونوں رہنماؤں نے دو طرفہ تعاون کو مزید تیز کرنے کے طریقوں پر تبادلہ خیال کیا۔ رابوکا کے پاس وزارت خارجہ بھی ہے۔ ہندوستانی وزیر خارجہ اس وقت فجی کے دورے پر ہیں۔ ڈاکٹر جے شنکر نے اپنے ٹویٹ میں کہاکہ 'سووا میں فجی کے وزیر اعظم کے ساتھ ملاقات میں تفصیل سے بات چیت ہوئی۔ ہندوستان ہماری شراکت داری کو ترجیحی شعبوں کے مطابق اپ گریڈ کرنے کے لیے پرعزم ہے۔
انہوں نے مزید کہاکہ "گرمٹیوں کا تعاون ہندوستان-فجی تعلقات کو مضبوط بنانے کے لیے کام کرنے کے لیے متاثر کن ہے۔ فجی-ہندوستانی تجربے کی داستان ہمارے لوگوں کی کوششوں کی عکاسی کرتی ہے، جنہوں نے گھر سے دور اپنے طرز زندگی کو ڈھال لیا ہے۔ ان کے تعاون کو ہمیشہ قدر کی نگاہ سے دیکھا جائے گا اور اسے مضبوط ہندوستان-فجی تعلقات کی سمت کام کرنے کے لیے ایک تحریک کے طور پر دیکھا جائے گا۔ بعد ازاں انہوں نے فجی میوزیم کا دورہ کیا اور وہاں ہندوستان کی حمایت یافتہ گرمٹ گیلری کا افتتاح کیا۔
واضح رہے کہ وزیر خارجہ ایس جے شنکر اور فجی کے صدر ولیم کاتونیورے نے بدھ کو ناڈی، فجی میں 12ویں عالمی ہندی کانفرنس کا افتتاح کیا تھا۔ افتتاحی تقریب میں ہندوستان اور فجی کے وزراء اور ارکان پارلیمنٹ نے شرکت کی۔ وزیر خارجہ نے ایک ٹویٹ میں بتایا تھا کہ 12ویں عالمی ہندی کانفرنس کے افتتاح کے موقع پر انہیں روایتی سیوو سیوو استقبال سے مفتخر محسوس کررہے ہیں۔ انہوں نے کہا تھا کہ 12ویں عالمی ہندی کانفرنس کے افتتاح کے موقع پر صدر رتو ولیم کاٹونیورے کی موجودگی میں روایتی سیووسیوو کا استقبال کرنا انتہائی اعزاز کی بات ہے۔
یو این آئی
