شرومنی گردوارہ پربندھک کمیٹی (ایس جی پی سی) کے صدر ایڈوکیٹ ہرجیندر سنگھ دھامی نے ڈیرہ سرسا کے سربراہ کے نام میں ڈیرہ کھولنے کے اعلان پر ردعمل ظاہر کرتے ہوئے حکومت سے ان کی سرگرمیوں پر فوری طور پر روک لگانے کی اپیل کی ہے۔
ایڈوکیٹ دھامی نے کہا کہ ڈیرہ سرسا کے سربراہ گرمیت رام رحیم کا کردار سماج دشمن ہے اور ان پر لگائے گئے الزامات گھناؤنے ہیں۔ عصمت دری اور قتل کے مقدمات میں سزا یافتہ رام رحیم بے ادبی کے مقدمات میں بھی اہم ملزم ہے۔ ایڈووکیٹ دھامی نے کہا کہ اس متنازعہ شخص کی طرف سے پنجاب میں ڈیرہ کھولنے کے اعلان سے سکھوں کے جذبات مجروح ہوئے ہیں اور اس سے پنجاب کا پرامن ماحول خراب ہوسکتاہے۔ انہوں نے کہا کہ حکومت پنجاب اس انتہائی سنگین معاملے میں ذمہ داری کے ساتھ اپنا کردار ادا کرے اور یہ عہد کرے کہ پنجاب میں ڈیرہ سرسا کی کوئی شاخ قائم نہیں ہونی چاہیے۔
ایس جی پی سی صدر نے کہا کہ اپنے برے کردار اور جرائم کی وجہ سے جیل میں بند رام رحیم کو بار بار پیرول دے کر سکھ ذہنیت کو ٹھیس پہنچائی جا رہی ہے اوریہ اب منسا میں اپنا ڈیرہ کھولنے کا اعلان کرنے کی سازش ہے۔ انہوں نے کہا کہ سکھ برادری ان کے اس فعل کو ہرگز برداشت نہیں کرے گی۔ حکومت کوگھناؤنے فعل کے مرتکب افراد کو عوام کے مذہبی جذبات سے کھیلنے کی اجازت نہیں دینی چاہیے۔
ایڈوکیٹ دھامی نے ایک بار پھر واضح کیا کہ پنجاب میں ڈیرہ سرسا کے سربراہ رام رحیم کی کسی بھی سرگرمی کو قبول نہیں کیا جائے گا۔ انہوں نے مرکزی اور ریاستی حکومتوں سے رام رحیم کی آن لائن تقاریر کو روکنے کا مطالبہ کیا، جب کہ وہ پیرول پر ہیں اور سنگین الزامات کا سامنا کر رہے ہیں۔
یواین آئی
