نئی دہلی: تین نئے زراعتی قوانین کے خلاف پنجاب، ہریانہ سمیت متعدد ریاستوں کے ہزاروں کسانوں کا احتجاج دہلی کی سرحدوں پر مسلسل آٹھ دنوں سے جاری ہے۔ پنجاب، ہریانہ ، اترپردیش اور اتراکھنڈ کے ہزاروں کسانوں نے دہلی کے ٹکری بارڈر اور سندھو سرحد کو مکمل طور پر جام کردیا ہے۔
نئے زرعی قوانین اور کسانوں کے احتجاج کے مسئلے پر کسان رہنما اور مرکزی حکومت کے مابین چوتھے دور کی بات چیت آج ہوگی۔ اس سے قبل منگل کے روز دونوں فریقین کے مابین مذاکرات بے نتیجہ ختم ہوگئی تھی۔اطلاعات کے مطابق وزیر اعلی پنجاب امریندر سنگھ بات چیت سے قبل مرکزی وزیر داخلہ امیت شاہ سے ملاقات کریں گے۔
مزید پڑھیں: کسانوں کی 'دہلی چلو تحریک' پر ایک نظر
'ایک ملک ایک بازار' سے کسانوں کو کیوں ہے اعتراض؟
خیال رہے کہ گذشتہ آٹھ دنوں سے متعدد کسان تنظیمیں زرعی قوانین کے خلاف دارالحکومت دہلی کے سرحد پر احتجاج کررہے ہیں۔
کسانوں کا مطالبہ ہے کہ مرکزی حکومت نئے زرعی قوانین کو واپس لے۔ اس سے قبل گذشتہ کئی ماہ سے پنجاب ہریایہ سمیت ملک کے متعدد ریاستوں میں کسانوں نے نئے زرعی قوانین کے خلاف احتجاج کے ذریعے نئے زرعی قوانین کو واپس لینے کا مطالبہ کر چکے ہیں۔
اس سے قبل پنجاب سے تعلق رکھنے والے کسان تنظیمون کی جانب سے 'ریل روکو' تحریک بھی چلائی گئی تھی، پھر بعد کسانوں کی تنظیموں نے 'دہلی چلو' کی کال دی جس پر پنجاب ہریانہ سمیت متعدد دیگر ریاستوں سے کسان دہلی پہنچ کر احتجاج کر رہے ہیں'۔
مسلسل احتجاج کی وجہ سے روز دفاتر اور کاروباری اداروں کے کھلنے سے ٹریفک کا مسئلہ مزید خراب ہوگیا ہے۔
ذرائع کے مطابق مرکزی حکومت کسانوں کے احتجاج کو جلد از جلد ختم کرنے کا خواہاں ہے، کیونکہ قومی دارالحکومت کی ناکہ بندی نے معیشت کو بری طرح متاثر کیا ہے۔
