نئی دہلی: ریاست کویت کے امیر شیخ نواف الاحمد الجابر الصباح کے انتقال پر اظہار تعزیت کے لیے وزیر خارجہ ایس جے شنکر نے پیر کی صبح دہلی میں کویت کے سفارت خانے کا دورہ کیا۔ وزیر جے شنکر نے سوشل میڈیا پر اپنے جذبات کا اظہار کرتے ہوئے کہا کہ آج صبح دہلی میں کویت کے سفارتخانے کا دورہ کیا تاکہ وہاں کے امیر محترم شیخ نواف الاحمد الجابر الصباح کے انتقال پر تعزیت کا اظہار کیا جا سکے۔ بھارت کی حکومت اور عوام ہمارے تعلقات کو مضبوط بنانے میں ان کی قابل ذکر شراکت کو ہمیشہ یاد رکھے گی۔
اس دوران وزیر خارجہ جے شنکر نے یکجہتی اور دوستی کے نشان کے طور پر سفارت خانے کے عملے سے بھارت کی تعزیت کا اظہار کیا اور سرکاری تعزیتی کتاب پر دستخط بھی کیے۔ وزیر نے دونوں ممالک کے درمیان تعاون اور افہام و تفہیم کو فروغ دینے میں مرحوم امیر کی اہم خدمات کو اجاگر کیا۔
شیخ نواف الاحمد الجابر الصباح کی رحلت پر نہ صرف کویت بلکہ عالمی برادری نے بھی بڑے پیمانے پر سوگ کا اظہار کیا ہے۔خاص طور پر اتوار کو ملک بھر میں ریاستی سوگ کا اعلان بھارتی حکومت نے مرحوم رہنما کے احترام کے طور پر کیا تھا۔ دنیا بھر میں بھارتی ہائی کمیشنوں، سفارت خانوں، قونصل خانوں اور بھارتی ہاؤسز کی تمام عمارتوں پر بھارتی ترنگا کو سرنگوں کیا گیا اور تمام سرکاری تفریحی سرگرمیاں منسوخ کر دی گئیں۔
وزیر اعظم نریندر مودی نے بھی تعزیت کا اظہار کرتے ہوئے کہا کہ انھیں کویت کے امیر کے انتقال کی خبر گہرا دکھ پہنچا ہے۔ سوشل میڈیا پلیٹ فارم ایکس پر ایک پوسٹ میں، پی ایم مودی نے لکھا کہ "عزت مآب شیخ نواف الاحمد الجابر الصباح کے انتقال کے بارے میں جان کر بہت دکھ ہوا۔ ہم شاہی خاندان، قیادت اور عوام کے تئیں اپنی گہری تعزیت کا اظہار کرتے ہیں''۔ واضح رہے کہ امیر کویت شیخ نواف الاحمد الجابر الصباح ہفتہ کو 86 سال کی عمر میں انتقال کر گئے اور اتوار کو سپرد خاک کیا گیا۔
یہ بھی پڑھیں:
