دہلی وقف بورڈ سے اب آن لائن فتویٰ بھی ملیں گے

وقف بورڈ کی جانب سے جاری کردہ ای میل آئی ڈی پر اردو ہندی اور انگریزی زبان میں آن لائن شرعی مسائل کا حل معلوم کرسکتے ہیں۔

دہلی وقف بورڈ ایک جانب جہاں ضروتمندوں کی کفالت کر رہا ہے، وہیں اب شرعی مسائل میں بھی عوام کی رہنمائی کی جائے گی۔ دہلی وقف بورڈ نے علماء کے مشورہ پر دفتر وقف بورڈ دریا گنج میں 2020 میں باقاعدہ شعبہ دارالافتاء کا قیام کیا تھا جس نے 2021 میں باقاعدہ اپنی خدمات کا آغاز کیا جس کے لیے باقاعدہ دو تربیت یافتہ مفتی اور اسلامی اسکالر کا انتظام کیا گیا ہے۔
صدر مفتی، ذکاوت حسین قاسمی اور نائب مفتی محمد طیب قاسمی کی زیر نگرانی میں شرعی مسائل میں رہنمائی کے لیے ضرورتمند دفتر وقف بورڈ کے شعبہ دارالافتاء سے رجوع کر رہے ہیں اور زبانی، تحریری یا فون پر مفتیان کرام سے رہنمائی حاصل کر رہے ہیں۔
اب دفتر وقف بورڈ نے عوام کی مزید سہولت کے لیے اپنی میل آئی ڈی جاری کی ہے جس پر کوئی بھی ضرورتمند انگریزی، ہندی اور اردو زبانوں میں اپنے سؤالات بھیج کر شرعی رہنمائی حاصل کر سکتے ہے۔
دفتر وقف بورڈ نے fatwadelhiwaqfboard@gmail کے نام سے میل آئی ڈی جاری کی ہے۔
شعبہ کے صدر مفتی ذکاوت حسین قاسمی نے بتایا کہ دہلی وقف بورڈ کی جانب سے اٹھایا گیا یہ ایک اہم قدم ہے۔

انہوں نے کہا کہ عوام اپنی ضروریات کے لیے وقف بورڈ سے رجوع کرتے ہیں تاہم اب شرعی رہنمائی بھی عوام دفتر وقف بورڈ سے حاصل کرسکتے ہیں۔