راجستھان میں سری گنگا نگر کے پنچایتی دھرم شالہ میں آج منعقد پریس کانفرنس میں اکھل بھارتیہ کسان سبھا کے سینئر لیڈر رویندر ترکھان، رچھپال پنو، جے کسان تحریک کے رمن رندھاوا، کسان آرمی کے ستیہ رتیوال، کسان سنگھرش سمیتی کے صدر امر سنگھ بشنوئی، ترجمان سبھاش سہگل، ایڈووکیٹ بار ایسوسی ایشن کے صدر وجے ریواڑ وغیرہ کسان لیڈروں نے کہا کہ مرکزی حکومت جب ہٹ دھرمی پر اڑے رہ کر زرعی قوانین واپس لینے کے لئے تیارنہ ہوئی تو کسانوں کی تاریخی اور بے مثال تحریک کو بدنام کرنے کی سازش رچی جانے لگی۔
رمن رندھاوا نے کہا کہ جب 22 جنوری کو آخری دور کی بات چیت ناکام ہوگئی تب متحدہ محاذ نے 26 جنوری کو ٹریکٹر ریلی کی تیاری کرنے کا بیان دیا۔
اس دن ہی وزیر زراعت نریندر سنگھ تومر نے بھی بیان دیا تھا کہ اب حکومت بھی اپنی تیاری کرے گی۔ ان کے اس بیان کا مطلب دہلی ہنگامے کے بعد سمجھ میں آیا کہ وہ کس تیاری کی بات کررہے تھے۔
مزید پڑھیں:
دہلی میں تشدد: 37 کسان رہنماؤں کے خلاف ایف آئی آر درج
انہوں نے کہا کہ دہلی میں ہنگامہ کسان تنظیموں کے اتحاد کو ختم کرنا ہی نہیں بلکہ تحریک کو اصل بات سے گمراہ کرنے کی بھی سازش ہے لیکن سبھی کسان تنظیمیں اب بھی متحد ہیں۔
یو این آئی
