بھارتی سینما اسکرین پر طویل عرصے تک راج کرنے والی مینا کماری کو دنیا سے گزرےہوئے47 سال گزر گئے۔
انہوں نے اپنے 33 سالہ فلمی کریئر میں 90 سے زائد فلموں میں کام کیا جن میں پری نیتا، کاجل، پھول اور پتھر، دل ایک مندر،آرتی، پاکیزہ اور صاحب بی بی اور غلام جیسی مشہور فلمیں شامل ہیں۔
ان کی فلم ’’پاکیزہ‘‘ فروری 1972 میں اس وقت ریلیز ہوئی جب وہ شدید بیمار تھیں اور اس فلم کی نمائش کو ابھی 2 ماہ بھی نہ گزرے تھے کہ31 مارچ کو مینا کماری دنیا سے کوچ کرگئیں تاہم اپنی باکمال اداکاری کے باعث وہ آج بھی لوگوں کے دلوں میں زندہ ہیں۔
مینا کماری ادب سے گہرا لگاؤ رکھتی تھیں، انہیں شاعری سے بھی محبت تھی، ان کی شاعری کا مجموعہ تنہا چاند کے نام سے شائع ہوا تھا۔
مینا کماری نے 60 کی دہائی میں مشہور شاعر اور ہدایت کار کمال امروہی سے شادی کی تاہم یہ شادی زیادہ دیر تک قائم نہیں رہ سکی۔
