وکٹری ڈے پریڈ پروگرام میں شامل ہونے کے لیے پیر کو روس روانہ ہونے سے قبل راج ناتھ سنگھ نے لداخ میں زمینی حالات اور حقیقی کنٹرول لائن(ایل اے سی) پر فوج کی تیاریوں کا جائزہ لیا۔
تینوں افواج کے سربراہان سے کہا گیا کہ فوج چوکس اور خبردار رہے اور بری، بحری اور فضائی حدود پر چینی سرگرمیوں پر گہری نظر رکھے۔
حقیقی کنٹرول لائن پر کچھ مقامات پر تجاوزات کی چین کی کوششوں کے سبب گزشتہ ماہ 5 مئی سے خطے میں فوجی تنازع جاری ہے۔ اسی تنازعہ کے دوران دونوں جانب سے فوجیوں میں گزشتہ 15 جون کی رات پرتشدد جھڑپ ہوئی جس میں بھارتی فوج کے ایک کرنل سمیت 20 جوان ہلاک ہوگئے تھے۔
اس کے بعد سے ہی دونوں ممالک نے اس خطے میں فوج بڑھا دی ہے اور سرحد پر کشیدگی کی صورتحال ہے۔
واضح رہے کہ وزیر دفاع راج ناتھ سنگھ لداخ کی حقیقی کنٹرول لائن کے حالات پر مسلسل نظر رکھے ہوئے ہیں اور وقفے وقفے سے اعلیٰ فوجی قیادت کے ساتھ میٹنگ کرکے صورتحال کا جائزہ لیتے رہتے ہیں۔
