مدرسہ انوار العلوم میں دونوں مذاہب سے تعلق رکھنے والے 101 جوڑوں کی مولویوں اور پنڈتوں نے اپنے اپنے مذہبی رسومات کے مطابق شادی کروائی۔
اس اجتماعی شادی کا اہتمام بیلا ہونگل قبضہ میں بیلا واڑ کی دس ایکڑ اراضی پر کیا گیا تھا۔ ایسا پہلی مرتبہ ہوا جب ہندو اور مسلم اجتماعی شادیوں کا اہتمام ایک مدرسہ کی جانب سے کیا گیا۔
اس اجتماعی شادی میں بیلا ہونگل، کٹور ، کھان پور ، راما درگا اور سوادتی تعلقہ سے تعلق رکھنے والے دلہا اور دلہن شامل ہیں۔ اس اجتماعی شادی میں ہزاروں افراد نے شرکت کی اور دلہوں اور دلہنوں کو مبارکباد پیش کی۔
اس شادی میں رکن اسمبلی مہانتیش کوجلگی کے علاوہ کئی بڑے رہنما اور سیاسی جماعتوں کے قائدین نے بھی شرکت کی۔
ہر جوڑے کو کئی ہزار روپیوں پر مشتمل تحائف بھی پیش کیے گئے۔ تحفوں میں فرج ، بستر اور پلنگ ، سلائی مشین کے علاوہ دیگر گھریلو اشیاء اور کپڑے بھی دیئے گئے۔
اس اجتماعی شادی سے پوری ریاست میں فرقہ وارانہ ہم آہنگی کی مثال قائم ہوئی جس میں شہریت ترمیمی قانون کے مواقفت اور مخالفت میں بیان بازی جاری ہے۔
