مرکزی وزیر صحت ڈاکٹر ہرش وردھن نے کہا ہے کہ ڈرائے رن مکمل ہوجانے کے بعد ملک بھر میں کورونا ویکسین مفت میں مہیا کرائی جائے گی۔
جب وزیر صحت سے یہ سوال پوچھا گیا کہ کیا دہلی میں کورونا ویکسین مفت ہوگی، تو یا تمام ریاستوں میں بھی مفت ہوگی؟ تو مرکزی وزیر صحت ڈاکٹر ہرش وردھن نے کہا کہ کورونا ویکسین نہ صرف دہلی بلکہ پورے ملک میں مفت ہوگی۔
خیال رہے کہ ملک کی سبھی ریاستوں اور مرکز کے زیر انتظام علاقوں میں ہفتے یعنی آج سے کورونا ویکسین کا ڈرائے رن کیا جا رہا ہے، ڈرائے رن کیے جانے کا مقصد کورونا ویکسینیشن کی مہم میں آنے والے چیلیجنز کی نشاندہی کی جا سکے۔ ساتھ ہی اس پر عمل درآمد کے مابین روابط کی جانچ پڑتال ہو سکے۔
مرکزی وزیر صحت ڈاکٹر ہرش وردھن نے آج دہلی کے گرو تیغ بہادر اسپتال میں ہونے والے ڈرائے رن کا جائزہ لیا۔
وہیں ویکسین کے استعمال کے بارے میں پھیلائی جانے والی افواہوں پر مرکزی وزیر صحت ڈاکٹر ہرش وردھن نے کہا کہ میری عوام سے اپیل ہے کہ وہ کسی طرح کی افواہوں میں نہ آئیں، حکومت ہند ملک کے لوگوں کو کورونا سے بچانا چاہتی ہے، ویکسین کی ترقی اسی عمل کا ایک حصہ ہے۔
