دہلی یونیورسٹی (ڈی یو) میں ڈگری کورسز کے لیے داخلے جاری ہیں اسی کے تحت یونیورسٹی نے سنیچر کو دیر شام میں تیسری کٹ آف لسٹ جاری کی۔
تیسری کٹ آف لسٹ کے مطابق بی کام، بی کام آنرز، انگلش آنرز، اکنامک آنرز اور پالیٹیکل آنرز سمیت متعدد ڈگری کورسز میں داخلے کے مواقع ختم ہوچکے ہیں۔
لیکن ہندو کالج، شری رام کالج آف کامرس، لیڈی شری رام کالج فار ویمن، ہنسراج کالج، رامانجن کالج، دیال سنگھ کالج، کروڑی مل کالج اور رامجس کالج شامل میں ابھی بھی داخلے کے مواقع ہیں۔
تعلیمی سال 2020۔21 کے لیے دہلی یونیورسٹی میں پہلی اور دوسری کٹ آف لسٹ کو ملا کر یونیورسٹی کی 70 ہزار سیٹ میں سے 52 ہزار 183 سیٹ پر ایڈمیشن ہوچکے ہیں اور طلبأ نے اس کی فیس بھی ادا کردی ہے۔
اس کے علاوہ ڈی یو میں جنرل کیٹیگری کے طلبأ کے لیے داخلے کے مواقع انتہائی کم ہیں کیونکہ یہاں کے تمام کالجز میں جنرل کیٹیگری کی سیٹ پر داخلے ہوچکے ہیں اور تیسری کٹ آف لسٹ میں صرف ریزرو طبقے کے طلبأ کو ہی داخلے کے مواقع زیادہ ہیں۔
واضح رہے کہ تیسری کٹ آف لسٹ کے لیے امیدوار طلبأ 26 تا 28 اکتوبر شام پانچ بجے تک ایڈمیشن لے سکتے ہیں وہیں فیس جمع کرانے کی آخری تاریخ 31 اکتوبر 11:59 بجے تک کا موقع دیا گیا ہے۔
رواں برس کورونا وائرس انفیکشن کی وجہ سے یونیورسٹی انتظامیہ نے داخلے کے تمام مراحل کو آن لائن طریقے سے ہی انجام دینے کا فیصلہ کیا ہے۔
