رشی کپور کے انتقال پر فلمی ہستیوں کا اظہارِ خیال

رشی کپور کی موت کی خبر سن کر پورا فلمی حلقہ سوگوار ہوگیا ہے، رشی کپور اور ان کے خاندان کو قریب سے جاننے والے اداکار و ہدایتکاروں نے گہرے رنج کا اظہار کیا ہے۔

بھوجپوری کے معروف اداکار روی کشن نے افسوس کا اظہار کرتے ہوئے کہا ہے کہ' گزشتہ روز عرفان خان چل بسے اور آج صبح رشی کپور نہیں رہے'۔ روی کشن نے رشی کپور سے کی گئی اپنی ایک ملاقات اور ان کے تعلق سے اپنی کئی یادگار باتیں بتائیں۔

مشہور فلم ڈائریکٹر مدھر بھنڈارکر نے کہا ہے کہ 'یہ انتہائی تکلیف دہ خبر ہے کہ رشی کپور اب ہمارے درمیان نہیں رہے، وہ با صلاحیت اداکار تھے، اپنے کریئر کے ابتدا سے انھیں کامیابی ملی اور وہ ہر قسم کا کردار ادا کرلینے والے شخص تھے۔

وندو دارا سنگھ نے کہا ہے کہ'رشی کپور کی موت کی خب سن کر مجھے انتہائی رنج پہنچا ہے'۔

انھوں نے مزید کہا کہ وہ بچپن سے رشی کپور کو جانتے تھے اور اکثر ان کے آر کے اسٹوڈیو میں جاکر ہولی منایا کرتے تھے، ان کے ساتھ گھر جیسے تعلقات تھے۔