ریاست بہار کے بھاگلپور ضلع میں واقع مدرسہ اشرفیہ مانچھی پور میں ان دنوں اقوام متحدہ برائے آبادی فنڈ مولانا آزاد اردو نیشنل یونیورسٹی اور جامعہ ملیہ اسلامیہ یونیورسٹی اور بہار مدرسہ بورڈ پٹنہ کہ مشترکہ کاوشوں سے بہار کے سرکاری مدارس کے معلمین کو ٹریننگ دی جا رہی ہے تاکہ وہ نئے طرز تعلیم کے ذریعہ بچوں کو پڑھانے کا ہنر سیکھ سکیں۔
اس مدرسہ میں بھاگلپور کمشنری کے مدرسین کو ترتیب دی جا رہی ہے اور مختلف سرگرمیوں کے ذریعہ پڑھانے کی ٹریننگ دی جا رہی ہے، تاکہ یہ معلمین بچوں میں پڑھائی کے تئیں رغبت پیدا کرسکیں، اور مدارس سے بچوں کے ڈراپ آوٹ کو روکا جاسکے۔
اب تک یہاں سے ایک بیچ کو تربیت دی جا چکی ہے جب کہ باقی دو بیچ اب بھی چل رہے ہیں، اور معلمین بھی اس ٹریننگ کو لے کر کافی دلچسپی دکھا رہے ہیں۔
اس ٹریننگ کا مقصد یہ ہے کہ نو بالغان یعنی 12 سے 18 سال کی عمر کے پڑھنے والے بچوں میں زندگی کے امور میں فروغ حاصل ہو اور اس کے لیے جامعہ ملیہ ملیہ اسلامیہ یونیورسٹی نے اس ٹریننگ کا ماڈیول تیار کیا ہے۔
جب کہ اساتذہ کو ٹریننگ دینے کی ذمہ داری مولانا آزاد اردو نیشنل یونیورسٹی پر ہے جس کو وہ بخوبی انجام دے رہی ہے۔ تعلیم کے سلسلے میں بہار کے سرکاری مدرسین پر ہمیشہ انگلیاں اٹھتی رہی ہیں ایسے میں اس طرح کے تربیتی پروگرام سے امید کی جانی چاہیے کہ مدارس کے تعلیمی معیار میں بہتری آئے گی۔
