ریاست اترپردیش کے رامپور میں قدیم کتب خانہ اور تاریخی صولت پبلک لائبریری کے صدر کا انتخاب عمل میں آ چکا ہے۔ رامپور کی معروف علمی و ادبی شخصیت شوکت علی خان ایڈووکیٹ لائبریری کے نئے صدر منتخب ہوئے ہیں۔
نومنتخب صدر شوکت علی خان نے ای ٹی وی بھارت سے خصوصی بات چیت کرتے ہوئے کہا کہ لائبریری اور اس میں موجود کتابوں کے تحفظ کے لئے سب سے پہلے ضروری ہے کہ لائبریری کی عمارت کی تزئین کاری کی جائے۔
انہوں نے کہا کہ یہ قدیم عمارت ماضی میں رکھ رکھاؤ نہیں کئے جانے کی وجہ سے کافی بوسیدہ ہو گئی ہے، کبھی بھی گر سکتی ہے اور کوئی بڑا حادثہ درپیش آ سکتا ہے۔ اس لئے کی چھت کی مرمت اور تزئین کاری کی جائے گی۔
انہوں نے کہا کہ لائبریری میں موجود کتابوں کی جلد کاری کی جائے گی اور مختلف مقامات پر بکھری ہوئی لائبریری کی کتابوں کو یکجا کرکے لائبریری کی شیلف میں ترتیب کے ساتھ لگایا جائے گا تاکہ قارئین یہاں پہنچ کر آسانی سے مطالعہ کر سکیں۔
ایک سوال کے جواب میں شوکت علی خان ایڈووکیٹ نے کہا کہ صولت پبلک لائبریری جو کتابوں کا قبرستان بن چکا تھا اب ہماری کوشش ہوگی کہ اہل علم اور دیگر لائبریریز سے رابطے قائم کرکے اس قبرستان کو دانش کدہ میں تبدیل کیا جائے۔
انہوں نے کہا کہ جو ہمارے ذہن میں نقشہ ہے، اس پر بھی عمل درآمد کریں گے اور باہمی مشوروں میں جو باتیں طے ہوں گی اس پر بھی عمل کیا جائے گا۔
عام طلبہ کس طرح سے اس لائبریری سے استفادہ کر سکیں گے؟ ہمارے اس سوال کے جواب میں انہوں نے لائبریری کے دروازے ہمیشہ تمام قارئین کے لیے کھلے ہوئے ہیں۔ انہوں نے صولت پبلک لائبریری کی بنیادی خصوصیت بتاتے ہوئے کہا کہ یہ خصوصی طور پر اردو کی لائبریری ہے اس لئے ہم یہاں اردو کتب اور رسائل کی دستیابی خصوصی طور پر کریں گے۔
یہ بھی پڑھیں: اترپردیش میں مافیا اب دوربین سے بھی نظرنہیں آتے: امت شاہ
نومنتخب صدر نے لائبریری سے متعلق اردو زبان پر زور دیتے ہوئے کہا کہ بدقسمتی سے گذشتہ کئی برسوں سے اس لائبریری کے وہ لوگ بھی اراکین ہو گئے جو اردو سے ناواقف ہیں، جس کی وجہ سے اس لائبریری کا کافی مالی نقصان ہوا ہے۔ انہوں نے کہا کہ ایسے افراد کی نشادہی کرکے ان کا اخراج بھی کیا جائے گا۔
بہرحال اب دیکھنے والی بات یہ ہوگی کہ لائبریری کے تحفظ اور بقاء کے متعلق جن باتوں کا تذکرہ یہاں نومنتخب صدر نے کیا ہے اس پر کتنا عمل درآمد کیا جا سکے گا۔
