سرینگر: وزیر دفاع راج ناتھ سنگھ نے جموں و کشمیر کے بڈگام میں بھارتی فوج کے زیر اہتمام 'شوریہ دیوس' پروگرام میں شرکت کی۔ اس دوران لیفٹیننٹ گورنر منوج سنہا ان کے ساتھ موجود تھے۔ اس موقع پر وزیر دفاع راج ناتھ سنگھ نے کہا کہ 'بھارت کی ایک بہت بڑی عمارت جو آج ہم دیکھ رہے ہیں، یہ ہمارے بہادر فوجیوں کی قربانیوں کی بنیاد پر قائم ہے۔ بھارت نام کا یہ بہت بڑا برگد کا درخت ان بہادر سپاہیوں کے خون اور پسینے سے سینچا ہوا ہے۔ Pakistan Occupied Kashmir
راج ناتھ سنگھ نے کہا کہ 'تقسیم ہند کی کہانی 1947 میں پاکستان اور بھارت کے درمیان لکھی گئی۔ اس کہانی کی خونی روشنائی ابھی خشک بھی نہیں ہوئی تھی کہ پاکستان کی جانب سے نئی اسکرپٹ لکھی جانی شروع ہوگئی۔ تقسیم کے چند دنوں میں پاکستان کا جو کردار ابھرا اس کا تصور بھی نہیں تھا۔ وزیر دفاع نے کہا کہ آج کا 'شوریہ دیوس' ان بہادر سپاہیوں کی قربانیوں کو یاد کرنے کا دن ہے جنہوں نے ملک کے لیے اپنی جانوں کا نذرانہ پیش کیا ہے۔ آج ان کی قربانی اور لگن کو دل سے سلام کرنے کا دن ہے۔ Violence and Harassment in POK
وزیر دفاع راج ناتھ سنگھ نے پاکستان کے زیر قبضہ کشمیر (پی او کے) کے لوگوں کو 'تشدد اور ہراساں کرنے' کا سہارا لینے پر پاکستانی حکومت کو تنقید کا نشانہ بناتے ہوئے کہا کہ بھارت پارلیمنٹ میں منظور کی گئی 1994 کی قرارداد پاکستان کے غیر قانونی قبضے کے تحت کشمیر کا حصہ واپس لینے کو نافذ کرنے کے لیے پرعزم ہے۔
بڈگام میں انفنٹری ڈے کی تقریب سے خطاب کرتے ہوئے راج ناتھ سنگھ نے کہا کہ 'بھارت پی او کے کے ہر شہری کا درد محسوس کرتا ہے جہاں تشدد اور ہراساں کرنا معمول کی بات ہیں۔ پاکستان حکومت پی او کے میں نفرت کے بیج بو رہی ہے اور وہ وقت دور نہیں جب لوگ وہاں بڑے پیمانے پر بغاوت کا سہارا لیں گے۔ انہوں نے کہا کہ بھارت گلگت اور بلتستان سمیت پاکستان کے غیر قانونی قبضے سے کشمیر کو واپس لینے کے بارے میں پارلیمنٹ میں منظور کی گئی قرارداد پر عمل درآمد کے لیے پرعزم ہے۔ پاک مقبوضہ کشمیر کے لوگوں کو تمام بنیادی حقوق سے محروم رکھا جا رہا ہے اور ہم اس سے پوری طرح واقف ہیں۔ انہوں نے کہا کہ سردار ولبھ بھائی پٹیل کا خواب اس وقت پورا ہوگا جب 1947 کے تمام مہاجرین کو ان کی زمینیں اور گھر واپس ملیں گے اور میں یقین دلاتا ہوں کہ وہ دن ضرور آئے گا۔
انہوں نے کہا کہ دفعہ 370 کی منسوخی کے بعد جموں و کشمیر کامیابی، امن اور خوشحالی کی طرف گامزن ہے۔ دفعہ 370 کو واپس لینے سے پہلے کشمیری سماج کو حصوں میں تقسیم کیا گیا تھا لیکن 5 اگست 2019 کے بعد معاشرے کے تمام طبقات اجتماعی طور پر کامیابی اور خوشحالی کی طرف بڑھ رہے ہیں۔یہ صرف شروعات ہے۔ راج ناتھ سنگھ نے کہا کہ دفعہ 370 کی منسوخی نے جموں و کشمیر میں ایک نئی شروعات کی ہے۔ جموں و کشمیر کے لوگوں نے بڑی امید کا اظہار کیا اور جموں و کشمیر کے بھارت کے الحاق کے ساتھ مکمل انضمام کی حمایت کی۔ جموں و کشمیر اور لداخ، مرکز کے زیر انتظام علاقے ترقی کر رہے ہیں اور معاشرے کے ہر طبقے کو ان کے جائز حقوق مل رہے ہیں۔
وزیر دفاع نے کہا کہ '1947 میں بھارتی فوج نے ان دشمنوں کو منہ توڑ جواب دیا تھا جنہوں نے کشمیر پر غیر قانونی قبضہ کر کے فساد کرنے کی کوشش کی۔ میں بھارتی فوج کی انفنٹری رجمنٹ کو زبردست خراج تحسین پیش کرتا ہوں جنہوں نے حملہ آوروں کو پیچھے دھکیل کر عظیم قربانیاں دیں۔ انہوں نے کہا کہ انفنٹری ڈے ہمیں یاد دلاتا ہے کہ ہم اپنے دشمنوں کو جڑ سے اکھاڑ پھینکنے اور ملک کی خودمختاری کے تحفظ کے عہد کی تجدید کریں۔ سنگھ نے سرحدوں کی حفاظت اور ملک کو نئی بلندیوں پر لے جانے کے تئیں فوجیوں کی بہادری اور عزم کی ستائش کی۔
