وادی کشمیر میں جمعرات کو سخت سیکورٹی بندوبست کے بیچ یوم آزادی کے سلسلے میں فل ڈریس ریہرسل کی گئی تاہم کورونا وبا کی وجہ سے امسال پہلی بار ان تقریبات میں طلبا نے حصہ نہیں لیا۔
کشمیر میں یوم آزادی کے سلسلے میں فل ڈریس ریہرسل تقاریب منعقد
سری نگر کے ہائی سیکورٹی زون سونہ وار میں واقع شیر کشمیر کرکٹ اسٹیڈیم میں جمعرات کی صبح فل ڈریس ریہرسل کے موقع پر صوبائی کمشنر کشمیر پی کے پولے نے پرچم کشائی کی رسم انجام دی اور پریڈ کی سلامی لی۔
اس موقع پر ائی جی پی کشمیر وجے کمار نے میڈیا نمائندوں کو بتایا کہ یوم آزادی کے پُرامن انعقاد کے لیے سیکورٹی فورسز ہائی الرٹ پر ہیں۔
ذرائع کے مطابق کورونا وبا کے پیش نظر امسال فل ڈریس ریہرسل کے موقع پر طلبا نے شرکت نہیں کی اور فنکاروں کی طرف سے پیش کئے جانے والے دوسرے ثقافتی پروگرام بھی محدود ہی تھے۔ انہوں نے کہا کہ شیر کشمیر اسٹیڈیم امسال خالی ہی تھا۔
