سرینگر: عام آدمی پارٹی لیڈر شیمہ فاروقی نے سرینگر میں پریس کانفرنس کے دوران لیفٹیننٹ گورنر انتظامیہ کو سخت تنقید کا نشانہ بنایا۔ فاروقی نے جموں و کشمیر سب انسپکٹر اسامیوں کی بھرتی سمیت دیگر گھوٹالوں کا تذکرہ کرتے ہوئے کہا: ’’سنہ 2019سے لیفٹیننٹ گورنر انتظامیہ جموں و کشمیر میں شفاف گورننس کا دعویٰ کر رہی ہے تاہم زمینی حقائق کے اس بالکل بر عکس ہیں۔‘‘AAP leader Criticized LG Admin on SI Recruitment Scam
سب انسپکٹر بھرتیوں میں گھوٹالے کے حوالہ سے فاروقی نے کہا کہ حالیہ ایام میں 38مقامات پر چھاپے مارے گئے تاہم اس کی تفاصیل شیئر نہیں کی گئی۔ انہوں نے الزام عائد کرتے ہوئے کہا کہ ’’ان گھوٹالوں میں بھاجپا لیڈران و کارکنان بھی ملوث ہیں یا پھر اثر و رسوخ والے افراد کو تحفظ فراہم کرنے کی سازش کی جا رہی ہے۔‘‘ فاروقی نے مزید کہا کہ ’’بد عنوانی میں ہریانہ گینگ کا نام بھی سامنے آیا ہے اور ہریانہ میں اس وقت بی جے پی برسر اقتدار ہے۔‘‘
عام آدمی پارٹی لیڈر کے مطابق ’’ہریانہ گینگ کی جانب سے امتحانی پرچے لیک کرنے اور امیدواروں سے لاکھوں روپے اینٹھنے کے انکشاف سے ظاہر ہوتا ہے کہ اس گھوٹالے کی جڑیں بہت گہری ہیں۔‘‘ فاروقی نے لیفٹیننٹ گورنر انتظامیہ سے اس حوالہ سے غیر جانبدارانہ رویہ اختیار کرنے کا مطالبہ کرتے ہوئے ملوث افراد کے خلاف کارروائی کی اپیل کی ہے۔
