پینے کے پانی کی قلت کے سبب ضلع رام بن کے ڈھلواس علاقے کے باشندوں نے محکمہ جل شکتی کے خلاف احتجاج کرتے ہوئے علاقے میں پینے کا پانی فراہم کرنے کا مطالبہ کیا۔
احتجاج کر رہے لوگوں نے دعویٰ کیا کہ سرینگر-جموں قومی شاہراہ کو کشادہ کرنے کے لئے جاری تعمیراتی کام کے دوران پانی کی سپلائی پائپ لائن کو نقصان پہنچا ہے جس کی وجہ سے ڈھلواس کے وارڈ نمبر 4 کے باشندے پینے کے صاف پانی کے لیے ترس رہے ہیں۔
انہوں نے جل شکتی محکمہ کے تئیں ناراضگی کا اظہار کرتے ہوئے کہا کے پائپ لائن کی مرمت کرنے کے حوالے سے کئی گزارشات کے باوجود پائپ لائن کی مرمت نہیں کی جا رہی ہے جس کے سبب گزشتہ کئی دنوں سے لوگ پانی جیسی بنیادی ضرورت سے محروم ہیں۔
انہوں نے مزید کہا کہ انہیں روزانہ کئی کلومیٹر کی مسافت طے کرکے پینے کا پانی دریائے چناب سے حاصل کرنا پڑتا ہے جو لوگوں کے لئے دشوار کن عمل ہے۔
مزید پڑھیں: رام بن: پانی حاصل کرنے کے لیے لوگ میلوں کا سفر کرنے پر مجبور
انہوں نے ضلع انتظامیہ سمیت محکمہ جل شکتی سے پائپ لائن کی مرمت کرکے لوگوں کو پینے کے پانے کے حوالے سے درپیش مشکلات کا جلد ازالہ کرنے کی اپیل کی۔
