کورونا وائرس کے مریضوں کی بڑھتی تعداد کے مدنظر انتظامیہ کی جانب سے جنوبی ضلع اننت ناگ میں لاک ڈاؤن کا نفاذ دوبارہ عمل میں لایا گیا۔
گزشتہ تقریبا دو ہفتہ قبل انتظامیہ کی جانب سے قصبہ اننت ناگ میں دکانیں اور کاروباری ادارے مرحلہ وار طریقہ سے کھولنے کی اجازت دی گئی تھی۔ وہیں لاک ڈاؤن کو ہٹانے کے ساتھ ہی ضلع کے سیاحتی مقامات پہلگام، کوکرناگ، اچھہ بل و دیگر مغل باغات میں مقامی سیاحوں کی تعداد میں اضافہ ہو رہا تھا۔ جس دوران لوگ ماسک، سماجی دوری و دیگر احتیاطی تدابیر کی پاسداری کو بالائے طاق رکھ کر کھلے عام گھوم رہے تھے۔
حالات کو سنگینیت کو مدنظر رکھتے ہوئے انتظامیہ نے گزشتہ روز سے ہی امتناعی احکامات دوبارہ نافذ کئے۔ تاہم انتظامیہ کی جانب سے گزشتہ شام لاک ڈاؤن کو دوبارہ نافذ کرنے کے سلسلہ میں با ضابطہ طور ایک حکمنامہ جاری کیا گیا۔ اور آج قصبہ اننت ناگ کے تمام داخلی اور خارجی راستوں کو مکمل طور سیل کر دیا گیا۔
ضلع کے کئی مقامات پر ناکے قائم کئے گئے ہیں جہاں پولیس اور سی آر پی ایف کی نفری کو تعینات کیا گیا ہے۔ جس دوران گاڑیوں اور موٹر سائیکل سواروں کی پوچھ تاچھ کی جارہی ہے۔ اور غیر ضروری طور سفر کرنے والے افراد کو قصبہ کے اندر داخل ہونے کی اجازت نہیں دی جا رہی ہے۔
قصبہ اننت ناگ میں تمام دکانیں اور کاروباری ادارے مکمل طور بند ہیں۔ جس کے سبب عام زندگی مفلوج ہو کر رہ گئی ہے۔
واضح رہے کہ حکومت کی جانب سے دارالحکومت سرینگر کے متعدد علاقوں میں کورونا وائرس کیسز میں اضافہ ہونے کے سبب دوبارہ لاک ڈاؤن نافذ کیا گیا ہے۔
