پرتاپ گڑھ: پیس پارٹی کے قومی صدر ڈاکٹر ایوب سرجن نے کہا کہ ملک کی آزادی کے بعد نافذ آئین کے بموجب سبھی مذاہب کے ماننے والوں کو اپنی زندگی گزر بسر کرنے ،اور مذہب پر عمل کرنے کی پوری آزادی حاصل ہے ،مگر ملک کے کچھ تنگ ذہن تنظیمیں جو ملک کی یکجہتی سالمیت کو توڑنے کے لیے روز بروز فرمان جاری کر مسلمانوں کو ہدف نشانہ بناکر خوف زدہ کرنے کا کام کر رہی ہیں۔ اسی طرح آر ایس ایس چیف موہن بھاگوت نے ملک کے مسلمانوں کو رہنے کی نصیحت کرتے ہوئے ہدایت جاری کی ہے ،جو ملک کی یکجہتی و سالمیت پر حملہ ہے ۔شائد آر ایس ایس چیف کو معلوم نہیں کہ ملک آئین سے چلے گا۔ ان کے فرمان سے نہیں ،مسلمان ان کی دھمکیوں سے خوف زدہ ہونے والا نہیں ہے۔ انہوں نے آر ایس ایس چیف کے فرمان کے ردعمل میں مذکورہ تاثرات کا اظہار کیا۔
ڈاکٹر ایوب سرجن نے کہا کہ آر ایس ایس چیف موہن بھاگوت نے آر ایس کے انگریزی ترجمان آرگنائزر کو انٹرویو دیتے ہوئے ملک میں مسلمانوں کو رہنے کے لیے جو شرط پیش کی ہے وہ قابل مذمت و آئین مخالف ہے ۔آئین کی دفعہ 14 و 15 میں اس بات کی صراحت موجود ہے کہ یہاں کسی بھی شہری کو مذہب یا ذات پات کی بنیاد پر کوئی برتری حاصل نہیں ہے ،مگر کچھ لوگوں کو اقتدار کا نشہ اس حد تک چڑھ گیا ہے ، کہ وہ خود کو تاقیامت اس ملک کے سیاہ سفید کا مالک سمجھ بیٹھے ہیں۔
یہی سبب ہے کہ ملک کے مسلمانوں کو مسلسل ہراساں و پریشان کیا جا رہا ہے ۔کبھی جے شری رام کا نعرہ نہ لگانے کے نام پر مارا جا رہا ہے، ابھی کچھ روز قبل مرادآباد کے ایک مسلم تاجر کو جے شری رام کا نعرہ نہ لگانے پر ٹرین کے اندر مارا پیٹا گیا۔ ملک کے کچھ مبینہ تنظیم ہندتوا کے نام پر شری رام چندر جی کے نام کو بدنام کرنے کے لیے انسانیت کو تار تار کر رہی ہیں ،کیا یہی شری رام چندر جی کا پیغام ہے؟ شائد وہ لوگ شری رام چندر جی کے آدرشوں پر چلتے تو انسانیت مجروح نہ ہوتی۔ انہوں نے کہا کہ ملک میں جیسے شرپسند عناصر کو کھلی چھوٹ دی گئی ہے ، کہ وہ جمہوریت و آئین و قانون کے خلاف کچھ بھی کریں ،انہیں قانون کے شکنجے میں نہیں لیا جائے گا۔ پیس پارٹی پوری طرح ملک کے حالات پر سنجیدہ ہے ،اور اس کے خلاف عدالت کا دروازہ کھٹکھٹائے گی۔
یہ بھی پڑھیں: Mohan Bhagwat Comments on Muslims مسلمانوں کو احساس برتری کو ترک کرنا ہوگا، بھاگوت
یو این آئی
