حیدرآباد: وزیر اعلیٰ ریونت ریڈی نے کہاکہ تلنگانہ میں کانگریس کی حکومت مکمل اکثریت کے ساتھ قائم ہوئی ہے اور کچھ لوگ کہہ رہے ہیں کہ اس حکومت کا تختہ الٹ دیا جائے گا۔ انہوں نے سوال کیا کہ کیا کسی میں اس حکومت کو گرانے کی ہمت ہے؟ ایک غریب کا بچہ وزیراعلیٰ کی کرسی پر بیٹھا ہے تو کچھ لوگوں کے پیٹ میں درد ہورہا ہے۔۔ سکندرآباد میں این ایچ 44 پر ایلیویٹیڈ کوریڈور کی تعمیر کا سنگ بنیاد رکھنے کے بعد، سی ایم نے کچھ دیر خواتین سے بات چیت کی۔ بعد ازاں انہوں نے ملکاجگری پارلیمانی حلقہ کے میڑچل میں منعقدہ عوامی آشیرواد میٹنگ میں شرکت کی۔
ریونت ریڈی نے اپنی حکومت کے گرنے کی پیشنگوئی کرنے پر اپوزیشن سے پوچھا کہ کیا سابق وزیر اعلی کے سی آر نے ان کے فارم ہاؤس میں جو عمارت تعمیر کی تھی وہ تین سال کے اندر منہدم ہو جائے گی۔ ریونت نے کہا کہ جو لوگ دھرنا چوک کو ہی ہٹا دینے کی بات کرتے تھے وہ آج وہاں دھرنا دے رہے ہیں۔ اس پروگرام میں وزراء سریدھر بابو، جوپلی کرشنا راؤ اور دیگر عوامی نمائندوں نے شرکت کی۔ اس موقع پر سی ایم ریونت ریڈی نے کہا کہ مجھے یہ عہدہ اس لیے ملا کیونکہ میں عوام کے لیے لڑا تھا۔ انہوں نے کہا کہ کانگریس کو اقتدار صرف کارکنوں کی مشکلات کی وجہ سے ملا ہے۔
وزیر اعلیٰ نے کہا کہ تمام موجودہ میٹرو لائنوں کو کانگریس حکومت نے منظوری دی ہے۔ انہوں نے پچھلی کے سی آر حکومت پر تنقید کرتے ہوے کہا کہ دس سالوں میں میٹرو لائن کا ایک بھی نیا کلومیٹر نہیں بڑھایا گیا۔ انہوں نے واضح کیا کہ اب حیدرآباد کے چاروں اطراف یکساں طور پر ترقی ہوگی۔ چیف منسٹر ریونت ریڈی نے کہا اس مہینے کی 12 تاریخ کو پریڈ گراؤنڈ میں ایک لاکھ خواتین کے ساتھ ایک بہت بڑا اجلاس منعقد کیا جارہا ہے اور تمام خواتین کو اس میں شرکت کرنی چاہئے۔ انہوں نے کہا کہ ان خواتین نے آر ٹی سی بسوں میں سفر کیا ہے۔ جو کہ حکومت کی طرف سے مفت سروس ہے، سی ایم ریونت ریڈی نے کہا کہ 200 یونٹ سے کم استعمال کرنے والوں کو بجلی مفت دی جاتی ہے۔ اس کے علاوہ 500 روپے کے گیس سلنڈر کی اسکیم بھی شروع کی جا چکی ہے۔
