لکھنئو: خواجہ معین الدین چشتی لینگویج یونیورسٹی لکھنؤ کی نیشنل سروس اسکیم کی سبھی یونٹس نے آج اتر پردیش الیکشن کمیشن کے زیر اہتمام واکتھون میں حصہ لیا۔مرکزی الیکشن کمیشن کی ایما پر 25 جنوری کوچودہویں نیشنل ووٹر ڈے سے قبل ووٹروں کو بیدار کرنے کے لئے ایک بڑی ریلی کا اہتمام کیا گیا تھا۔ یہ ریلی لکھنئو کےرومی دروازہ سےکونیشور چوراہے سے ہوکر چوک اسٹیڈیم تک اختتام پذیر ہوئی۔ اس واک تھون ریلی میں لینگویج یونیورسٹی کی نیشنل سروس اسکیم کے پروگرام آفیسرس کے ساتھ 200 رضاکاروں نےبڑے جوش و خروش سے حصہ لیا۔
اس واک تھون میں شرکت کے بعدیونیورسٹی کیمپس میں ووٹرسے متعلق آگاہی کے موضوع پر وائس چانسلر پروفیسراین بی سنگھ کی سرپرستی میں بھی ایک ریلی بھی نکالی گئی۔ اس موقع پر ڈاکٹر نلنی مشرا نے این ایس ایس اور دیگر طلبہ سے خطاب کرتے ہوئے کہا کہ جمہوری اقدار کے استحکام کے لئے اپنے ووٹ دینے کے حق کو استعمال کرنا چاہیے اور اس کی اہمیت کو سمجھنا چاہئے۔اس اہم پروگرام میں نیشنل سروس اسکیم کےکوآرڈنیٹر ڈاکٹر نلنی مشرا، پروگرام آفیسر ڈاکٹر ابھے کرشنا، ڈاکٹر رام داس، ڈاکٹر ظفرالنقی اور ڈاکٹر ممتا شکلا نے واک تھان میں حصہ لینے اور یونیورسٹی کیمپس میں ریلی کوانعقاد اور منظم کرنے میں اہم کردارادا کیا۔
