اترپردیش: سماج وادی پارٹی نے آئندہ لوک سبھا انتخابات کے لیے مزید 11 امیدواروں کا اعلان کیا ہے۔ مختار انصاری کے بھائی افضل انصاری کو غازی پور سے ٹکٹ دیا گیا ہے جبکہ ہریندر ملک کو مظفر نگر سے ٹکٹ دیا گیا ہے۔
غور طلب ہو کہ ایس پی نے راجیش کشیپ کو شاہجہان پور سے، اوشا ورما کو ہردوئی سے، رامپال راج ونشی کو مصریخ لوک سبھا سیٹ سے، آر کے چودھری کو موہن لال گنج سے، ایس پی سنگھ بگھیل کو پرتاپ گڑھ سے، رمیش گوتم کو بہرائچ سے، شریا ورما کو گونڈا سے، وریندر سنگھ کو چندولی سے اور نیرج موریہ کو آنولہ لوک سبھا سیٹ سے ٹکٹ دیا گیا ہے۔
ایس پی نے لوک سبھا انتخابات کے لیے کل 27 امیدوار کا اعلان کیا
سماج وادی پارٹی نے اس سے قبل 30 جنوری کو امیدواروں کی پہلی فہرست جاری کی تھی، جس میں 16 امیدواروں کے ناموں کا اعلان کیا گیا تھا۔ پہلی فہرست کے مطابق پارٹی نے ڈمپل یادو کو مین پوری سے، شفیق الرحمان برک کو سنبھل سے اور رویداس مہروترا کو لکھنؤ لوک سبھا سیٹ سے امیدوار بنایا ہے۔ اکھلیش یادو کی قیادت والی پارٹی ایس پی نے اب تک اترپردیش کی 80 لوک سبھا سیٹوں میں سے کل 27 سیٹوں کے لیے امیدواروں کا اعلان کیا ہے۔
یہ بھی پڑھیں:
راہل گاندھی کی یاترا میں اکھلیش نے شرکت نہیں کی
دوسری فہرست ایس پی نے ایسے وقت جاری کی ہے جب کانگریس لیڈر راہل گاندھی پارٹی کی بھارت جوڑو نیائے یاترا کے ساتھ اترپردیش میں ہیں۔ آج وہ امیٹھی میں ہیں، جو ان کی پرانی لوک سبھا سیٹ تھی۔ اکھلیش یادو انڈیا اتحاد کا حصہ ہیں لیکن کانگریس کے ساتھ مبینہ اختلافات کی وجہ سے انہوں نے راہل گاندھی کے دورے میں شرکت نہیں کی۔ ایسا مانا جاتا ہے کہ وہ سیٹوں کی تقسیم کے معاملے پر کانگریس سے اتحاد کرنے کے موڈ میں نہیں ہیں، جہاں وہ کانگریس کو 11 سیٹوں کی پیشکش کر رہے ہیں۔
