میڑتھ: ریاست اتر پردیش کے ضلع میرٹھ میں واقع سینکڑوں سال پرانی تاریخی درگاہ حضرت بالے میاں کا 1020واں عرس مبارک نوچندی جمعرات سے شروع ہونے جا رہا ہے۔ ایسے میں درگاہ کے باہر نالے کا گندہ پانی جمع ہونے سے درگاہ کمیٹی کے لوگوں میں میونسپل کارپوریشن کے تئیں ناراضگی دیکھی جا رہی ہے۔
حضرت بالے میاں درگاہ کمیٹی کے متولی مفتی اشرف کا کہنا ہے کہ میرٹھ میں حضرت بالے میاں کی درگاہ ایک تاریخی درگاہ ہے جہاں ہر سال نوچندی جمعرات سے عرس مبارک کا اہتمام کیا جا تا ہے۔اس سال حضرت بالے میاں کا یہ 1020واں عرس مبارک منایا جائے گا لیکن اس سے قبل میونسپل کارپوریشن کی درگاہ کے تئیں بے رخی بھی صاف دیکھی جا سکتی ہے۔
اشرف مفتی کا کہنا ہے کہ آنے والی نوچندی جمعرات سے جہاں بالے میاں کے عرس کی شروعات ہوگی وہیں میرٹھ کا تاریخی نوچندی میلا بھی شروع ہو جاتا ہے ایسے میں اس سےقبل درگاہ کے باہر نالے کا گندہ پانی جمع ہونے سے درگاہ پر آنے والے زائرین کو پریشانی کا سامنا کرنا پڑ تا ہے۔ دوسری جانب قبرستان کی قبروں میں بھی گندہ پانی پہنچنے سے ان کی بے حرمتی ہوتی ہے۔ آنے والی پریشانیوں کو مد نظر رکھتے ہوئے اب درگاہ کمیٹی ہی اپنے اخراجات سے نالے کی صاف صفائی کے کام کو انجام دے رہی ہے۔
یہ بھی پڑھیں:ہوائی جہازدیکھا لیکن ٹرین نہیں دیکھی، گیا کے سرکاری اسکول کو ٹرین کی شکل دیدی گئی - School Gets A Train Makeover
اشرف مفتی کا کہنا ہے کہ درگاہ کے عرس اور نوچندی میلے میں ہزاروں کی تعداد میں یہاں عقیدت مند آتے ہیں اور اپنی مرادیں پاتے ہیں لیکن میونسپل کارپوریشن کی بے رخی سے وہ مایوس ہے. جب کہ کئی مرتبہ ضلع مجسٹریٹ اور نگر نگر کے اعلیٰ افسران کو اس متعلق درخواست دی جا چکی ہیں۔ لیکن ابھی تک کوئی کارروائی نہیں ہوئی۔
