رانچی: جھارکھنڈ میں چمپئی سورین کے راج بھون میں وزیراعلیٰ کی حیثیت سے حلف لینے کے بعد حکمراں پارٹی کے تمام ایم ایل ایز کو سرکٹ ہاوس سے بذریعہ طیارہ حیدرآباد بھیج دیا گیا ہے۔ اراکین اسمبلی کو ٹوٹنے سے بچانے کے لیے انہیں حیدرآباد منتقل کردیا گیا ہے۔ اب تمام ایم ایل ایز فلور ٹیسٹ کے دن رانچی پہنچیں گے۔ ایم ایل ایز کو لے کر پہلا چارٹرڈ طیارہ دوپہر 1:35 بجے اور دوسرا چارٹرڈ طیارہ 1:45 بجے حیدرآباد کے لیے روانہ ہوا۔ چارٹرڈ طیارے میں کل 36 ایم ایل اے سوار تھے۔ اس میں جھارکھنڈ مکتی مورچہ اور کانگریس ایم ایل اے شامل ہیں۔ جھارکھنڈ کے ایم ایل اے حیدرآباد پہنچ گئے ہیں۔ جے ایم ایم اور کانگریس پارٹیوں سے تعلق رکھنے والے کل کل 36 قانون ساز دو پرائیویٹ طیاروں کے ذریعہ حیدرآباد پہنچے۔
تفصیلات کے مطابق 36 ایم ایل اے کے ساتھ جھارکھنڈ کے دیگر 50 لیڈر بھی حیدرآباد پہنچ گئے۔ یہ سب دو الگ الگ پروازوں کے ذریعہ حیدرآباد کے بیگم پیٹ ایئرپورٹ پہنچے، جس کے بعد انہیں دو اے سی بسوں میں شاہ میر پیٹ کے لیونیا ریسارٹس لے جایا گیا۔ انہیں ریاستی امور کے انچارج دیپداس منشی اور وزیر پونم پربھاکر کی قیادت میں ریزورٹس لے جایا گیا۔ اے آئی سی سی سکریٹری سمپت کمار، خیریت آباد ڈی سی سی صدر روہن ریڈی، سکندرآباد ڈی سی سی صدر انیل کمار یادو، ایل بی نگر کانگریس لیڈر مال ریڈی رامی ریڈی اور دیگر لیڈر ان کے ساتھ ریزورٹس میں موجود ہیں۔
