لکھنؤ: ہندوستانی کرکٹ ٹیم کے رکن بین الاقوامی کھلاڑی شیوم ماوی نے شاندار آل راؤنڈ کھیل کا مظاہرہ کیا جس کی بدولت کاشی رودرا کی ٹیم نے یوپی ٹی 20 لیگ 2024 میں سنسنی خیز مقابلے میں لکھنؤ فالکنز کو 3 وکٹوں سے شکست دے دی۔ شیوم ماوی نے 2 وکٹیں حاصل کیں اور 46 رنز کی تیز اننگز کھیلی۔
اٹل بہاری واجپائی ایکنا اسٹیڈیم میں جمعہ کو کھیلے گئے اس میچ میں شیوم نے سخت گیند بازی کی اور لکھنؤ کو سستے میں آؤٹ کرتے ہوئے 20 اوور میں 143 رنز تک محدود کردیا۔ اس کے بعد شیوم نے 20 گیندوں میں 2 چوکوں اور 5 چھکوں کی مدد سے 46 رنز کی شاندار بلے بازی کرتے ہوئے کاشی نے مقررہ ہدف 7 وکٹوں کے نقصان پر حاصل کر لیا۔
اس میچ میں پہلے بلے بازی کرنے آئی لکھنؤ کی ٹیم کے لیے شیوم گرگ نے سب سے زیادہ 60 رنز بنائے۔ شیوم گرگ نے 39 گیندوں کا سامنا کرتے ہوئے 4 چھکے اور 2 چوکے لگائے۔ سمیر چودھری نے 39 رنز بنائے اور 2 چوکے اور 1 چھکا لگایا۔ دوسری جانب اگر بولنگ کی بات کی جائے تو کاشی کی جانب سے شیو سنگھ نے 4 اوور میں 27 رن دے کر 2 وکٹ اور شیوم ماوی نے 4 اوور میں 32 رن دے کر 2 وکٹیں حاصل کیں۔
اس کے جواب میں ہدف کا تعاقب کرنے اتری کاشی کی ٹیم ایک وقت میں شکست کے خطرے کی طرف بڑھ رہی تھی۔ ٹیم 55 رنز بنا کر 5 بلے بازوں سے محروم ہو گئی۔ اس کے بعد یشوردھن سنگھ نے 25 گیندوں میں 41 رنز بنائے۔ انہوں نے 3 چوکے اور 3 چھکے لگائے۔ شیوم نے صرف 20 گیندوں کا سامنا کیا۔ انہوں نے 6 چھکے لگائے، 2 چوکے لگائے اور 46 رنز بنائے اور آخر تک ناٹ آؤٹ رہے۔ آخری اوور کی تیسری گیند پر کاشی نے لکھنؤ کے خلاف 3 وکٹوں سے کامیابی حاصل کی۔
لکھنؤ کی ٹیم کی یہ 4 میچوں میں تیسری شکست ہے۔ ٹیم نے جمعرات کو فتح حاصل کی تھی۔ لیکن جمعہ کو لکھنؤ جیت کا سلسلہ برقرار نہیں رکھ سکا۔ لیگ کے سیمی فائنل میں رہنے کے لیے ٹیم کو اپنے باقی تمام میچز جیتنے ہوں گے۔
