سری نگر: جموں و کشمیر بخشی اسٹیڈیم میں آج شام کو لیجنڈز لیگ کرکٹ ٹورنامنٹ کا میچ کھیلا جائے گا۔ یہ مقابلہ حیدرآباد تویام اور سدرن سپر اسٹارز کے درمیان ہوگا۔یہ تقریباً 40 برسوں میں پہلی مرتبہ ہے کہ سری نگر میں اس شدت کا کرکٹ ٹورنامنٹ منعقد ہو رہا ہے۔
فی الحال پوائنٹس ٹیبل پر تویام حیدرآباد چوتھے نمبر پر ہے۔حیدرآباد نے چھ میچ کھیلے ہیں جس میں اسے دو مقابلوں میں جیت ملی ہے جبکہ تین میں شکست کا سامنا کرنا پڑا ہے، ایک میچ بارش کی وجہ سے منسوخ ہو گیا تھا۔ حیدرآباد مسلسل دو فتوحات کے ساتھ اس مقابلے کو بھی جیتنے کے لئے پر جوش ہے۔ گروپ مرحلے کا یہ ان کا آحری مقابلہ ہے اس لئے یہ میچ جیتنے کے لئے جی توڑ کوشش کر ے گی۔
اس کے برعکس، سدرن سپر اسٹارز ٹیبل میں سب سے اوپر ہے، جو پہلے ہی اپنے چھ میچوں میں صرف ایک ہار کے ساتھ ناک آؤٹ مرحلے کے لیے کوالیفائی کر چکی ہے۔ یہ مقابلہ سپر اسٹارز کے لیے وارم اپ کا کام کرے گا۔ دلچسپ بات یہ ہے کہ یہ دوسرا موقع ہے جب یہ ٹیمیں ٹورنامنٹ میں مقابلہ کریں گی، حیدرآباد نے ڈی ایل ایس طریقہ کے ذریعے اپنا پہلا مقابلہ پانچ رنز سے آسانی سے جیت لیا تھا۔
ایل ایل سی 2024، جس کا آغاز 20 ستمبر سے ہوا، اس میں چھ ٹیمیں شامل ہیں۔ انڈیا کیپٹلز، گجرات جائنٹس، کونارک سوریاس، منی پال ٹائیگرز، سدرن سپر اسٹارز، اور تویام حیدرآباد۔ جعمرات کو ایان بیل کی قیادت میں انڈیا کیپٹلز کا مقابلہ منی پال ٹائیگرز سے ہوگا، جس کی کپتانی ہربھجن سنگھ کر رہے ہیں۔
اس کے بعد، 11 اکتوبر کو عرفان پٹھان کی قیادت میں کونارک سوریاس اوڈیشہ، شیکھر دھون کی قیادت میں گجرات جائنٹس کے خلاف کھیلے گی۔ ٹورنامنٹ کا کوالیفائنگ میچ 12 اکتوبر کو مقرر ہے، 13 اکتوبر کو ایلیمینیٹر کے ساتھ۔ سیمی فائنل 14 اکتوبر کو ہوگا، اور گرینڈ فائنل 16 اکتوبر کو شام 7 بجے شیڈول ہے۔
اس ٹورنامنٹ کی اہمیت کے پیش نظر سخت حفاظتی انتظامات کیے گئے ہیں۔ سینئر پولیس حکام نے مختلف سیکورٹی ایجنسیوں کے ساتھ مل کر کھلاڑیوں، آفیشلز اور شائقین کی حفاظت کو یقینی بنانے کے لیے ایک جامع منصوبہ تیار کیا ہے۔
