جموں: وزیر اعظم دفتر میں تعینات وزیر مملکت ڈاکٹر جتیندر سنگھ نے جمعے کے روز کہا کہ پی ایم مودی 20 فروری کو جموں میں ایک بڑے عوامی جلسے سے خطاب کریں گے۔انہوں نے کہا کہ جلسے میں لوگوں کی شرکت کو دیکھتے ہوئے سکیورٹی کے غیر معمولی انتظامات کئے گئے ہیں۔
جموں میں نامہ نگاروں سے بات چیت کے دوران وزیر مملکت ڈاکٹر جتیندر سنگھ نے کہا کہ وزیر اعظم نریندر مودی کے دورے جموں وکشمیر کے پیش نظر سبھی طرح کے انتظامات مکمل کئے گئے ہیں۔انہوں نے کہا کہ لوگ کافی پر جوش نظر آرہے ہیں اور آج سے ہی جلسے میں شرکت کے لئے لوگوں نے تیاریاں شروع کی ہیں۔ان کے مطابق وزیر اعظم مودی جموں وکشمیر کو لے کر بہت سارے پروجیکٹوں کا افتتاح کریں گے۔
مرکزی وزیر مملکت نے بتایا کہ لوگ وزیر اعظم کے دورے کا بے صبری کے ساتھ انتظار کر رہے ہیں۔انہوں نے بتایا کہ جموں اور کشمیر دونوں صوبوں سے لوگوں کی جلسے میں شرکت کے پیش نظر تیاریاں زور و شور سے شروع کی گئی ہیں۔انہوں نے مزید بتایا کہ وزیر اعظم مودی نے جموں وکشمیر کے لوگو ں کے لئے بہت سارے کام کئے۔
مزید پڑھیں: پارلیمانی انتخابات سے قبل مودی کا کشمیر دورہ متوقع
ڈاکٹر جتیندر سنگھ نے کہا کہ’نریندرمودی نے ہمیشہ لوگوں کی بات کی، عام لوگوں کے ساتھ جڑنے کی خاطر من کی بات کا پروگرام شروع کیا اور دوسرے ذرائع کے ذریعے بھی عام لوگوں کے ساتھ جڑنے کی بھر پور سعی کی ۔‘ان کے مطابق وزیر اعظم مودی کو دیکھنے کی خاطر جموں وکشمیر کے لوگ کافی پرجوش نظر آر ہے ہیں۔
(یو این آئی)
