سوناواری: جموں و کشمیر کے سمبل سوناوری اسمبلی انتخابات کے تیسرے اور آخری مرحلے کے لیے منگل کو 40 نشستوں پر ووٹنگ کا سلسلہ صبح سات بجے سے ہی جاری ہے۔ اس مرحلے میں سات اضلاع شامل ہیں۔ 39.18 لاکھ سے زیادہ اہل ووٹرز 1415 امیدواروں کی قسمت کا فیصلہ کریں گے۔
2019 میں دفعہ 370 کی منسوخی کے بعد جموں و کشمیر میں پہلی بار اسمبلی انتخابات کے تحت ووٹ ڈالنے کا عمل جاری ہے۔ شمالی کشمیر کے اسمبلی حلقوں میں پولنگ صبح 7 بجے سخت سیکیورٹی کے درمیان شروع ہوئی۔ آج سمبل سونا واری علاقے میں صبح سے ہی ووٹنگ کا سلسلہ جاری ہے۔
میڈیا سے بات کرتے ہوئے لوگوں نے بتایا کہ وہ چاہتے ہیں کہ ان کے بنیادی مسائل حل ہوں، اسی وجہ سے وہ ایک بار پھر ووٹ دینے جا رہے ہیں۔ انہیں امید ہے کہ جن نمائندوں کو وہ منتخب کریں گے، وہ ان کے مسائل کا حل لے کر آئیں گے۔ عوام کو امید ہے کہ اس بار ایسے امیدوار آئیں گے جو حلقے کے ترقیاتی کام کریں گے۔
ای سی آئی کے مطابق، یونین ٹیریٹری کے سات اضلاع کے 40 حلقوں میں کل 39.18 لاکھ سے زیادہ ووٹر اپنے حق رائے دہی کا استعمال کریں گے۔
یہ بھی پڑھیں:
سات اضلاع کپواڑہ، بارہمولہ، بانڈی پورہ، ادھم پور، سانبہ، کٹھوعہ اور جموں میں کل 5,060 پولنگ اسٹیشن پر ووٹنگ جاری ہے۔ 39,18,220 اہل ووٹر اپنا ووٹ استعمال کر رہے ہیں، جن میں 20,09,033 مرد، 19,09,130 خواتین اور 57 تیسری جنس کے افراد شامل ہیں۔ ان میں سے 1.94 لاکھ ووٹرز 18 سال کی عمر کے ہیں جو پہلی بار اپنی حق رائے دہی کا استعمال کررہے ہیں۔ لوگوں میں کافی جوش ہے اور انہیں امید ہے کہ جو امیدوار ان انتخابات میں کامیاب ہونگے وہ حلقے کے لئے ترقیاتی کام کریں گے جس سے روزگار کے مواقعے پیدا ہونگے اور وادی میں امن و سکون پیدا ہوگا۔
