گلمرگ: مرکزی وزیر مملکت برائے یوتھ افیئرز اینڈ اسپورٹس نشت پرمانک نے کہا کہ وزیر اعظم نریندر مودی کی قیادت میں پورے ملک کے ساتھ ساتھ جموں و کشمیر میں بھی کھیل کود کو بڑھاوا دیا جا رہا ہے۔ انہوں نے کہا کہ جموں و کشمیر بین الاقوامی کھیلوں کے مقابلوں کی میزبانی کے لیے تیار ہے۔
غور طلب ہو کہ گلمرگ کھیلو انڈیا کے چوتھے ایڈیشن پر انہوں نے کہا کہ اس بار کھیلو انڈیا کے سبھی ریکارڈ ٹوٹ گئے ہیں۔جس طرح ملک بھر سے کھلاڑی گلمرگ آئے ہیں اور وہ کھلاڑی اپنی صلاحیتوں کا مظاہرہ کررہے ہیں۔ اس کے لیے جموں و کشمیر کی سرکار اور خاص کر اسپورٹس کونسل کی کوشش ہے کہ کھلاڑیوں کو اچھا پلیٹ فارم مہیا کرایا جائے۔
اس موقع پر مرکزی وزیر مملکت نے مزید کہا کہ اب گلمرگ کو کس طرح ونٹر گیمز کے لئے مزید ڈیولپ کیا جائے اس پر کام کرنا ہوگا۔ لیکن اس بار بھی جس جوش کے ساتھ انتظامات کئے گئے ہیں وہ اپنے آپ میں ایک مثال ہیں۔ رواں سال کے کھیلو انڈیا گیمز سے صاف طور پر ظاہر ہوتا ہے کہ گلمرگ اب آنے والے وقت میں مزید آگے بڑھے گا۔
یہ بھی پڑھیں:
- بیک کنٹری اسکیئنگ پر پابندیاں کشمیر کی غیر ملکی سیاحت کو متاثر کر سکتی ہیں: فرحت نائک
- کھیلو انڈیا ونٹر گیمز2024: اسکیئنگ میں چار خاتون ایتھلیٹس کا غلبہ
قبل ازیں کھیلو انڈیا سرمائی کھیلوں کے حوالے سے بات کرتے ہوئے سنو کوچ فرحت نائک نے کہا کہ کھیلوں میں کافی بہتری آئی ہے۔ ایک پینل خصوصی طور پر انتظامات کو دیکھ رہا ہے، بہت کچھ ایسا ہوا ہے جو میں نے پہلے کبھی نہیں دیکھا تھا۔ مختلف ریاستوں سے بڑی تعداد میں کھلاڑی یہاں آرہے ہیں، کھیلو انڈیا کو کافی فروغ مل رہا ہے۔
