سرینگر: گیسٹرو اینٹرائٹس ہے کیا اور اس بیماری کے وجوہات کیا ہیں، احتیاط اور علاج کیا ہیں، اس پر ای ٹی وی بھارت کے نمائندے نے وادی کے معروف گیسٹرو اینٹرالوجسٹ ڈاکٹر منظور احمد وانی سے خصوصی گفتگو کی۔ اس حوالے سے انہوں نے کہا کہ گیسٹرو اینٹرائٹس آنتوں کا ایک طرح کا انفیکشن ہے، جس میں ابتدائی طور پر مریض پیٹ میں درد، پانی دار پاخانہ اور الٹی وغیرہ کی شکایت کرتا ہے۔ گیسٹرو اینٹرائٹس کا سب سے بڑا خطرہ پانی کی کمی ہے۔ کیونکہ یہ بیماری جسم سے سیالوں کا بہت زیادہ نقصان کرتا ہے۔
ڈاکٹر منظور احمد وانی نے کہا کہ بنیادی طور پر آنتوں کے انفیکشن کی وجہ سے، گیسٹرو اینٹرائٹس کی شدت مختلف ہو سکتی ہے، جس میں کچھ دنوں تک معدہ کی ہلکی خرابی سے لے کر شدید اسہال اور کئی دنوں تک الٹی ہو سکتی ہے۔ وائرس، بیکٹیریا اور دیگر جراثیم سمیت متعدد جراثیم اس خرابی کا سبب بن سکتے ہیں۔ بیرونی عوامل جیسے فوڈ پوائزننگ سے متاثرہ کھانا کھانا بھی گیسٹرو کا سبب بن سکتا ہے۔ اس کے علاوہ بیکٹیریا یا دیگر جراثیموں سے آلودہ پانی ایکیوٹ گیسٹرو اینٹرائٹس کی ایک اور عام وجہ ہے۔
انہوں نے ایک سوال کے جواب میں کہا کہ گیسٹرو اینٹرائٹس کے زیادہ تر معاملات میں اس کی علامات عام طور پر چند دنوں میں خود ہی صاف ہو جاتی ہیں، اس وقت تک آپ کا مدافعتی نظام عام طور پر انفیکشن کو صاف کر دیتا ہے۔ ایسی صورتوں میں جہاں علامات شدید ہوں۔ مریض کو پانی کی کمی یا دیگر پیچیدگیوں میں مدد کے لیے ہسپتال میں داخل ہونے کی ضرورت پڑ سکتی ہے۔
انہوں نے مزید کہا کہ اس بیماری سے بچنے کی خاطر اس موسم میں جسم میں پانی کی کمی ہونے نہیں دینی ہے اور ابالا ہوا پانی ہی پپینے اور کھانا پکانے کے لیے استعمال میں لایا جانا چاہیے۔ انہوں نے مزید کہا کہ ہیٹ ویو کے دوران پانی پینے کی مقدار کو بڑھایا جانا چاہیے۔ مثال کے طور 3 لیٹر کے بجائے 4 لیٹر پانی پینا چاہیے۔ جتنا جسم میں پانی کی مقدار برابر رہے گی۔ اس بیماری سے کافی حد تک بچا جاسکتا ہے۔
ایک سوال کا جواب دیتے ہوئے ڈاکٹر منظور نے کہا کہ متاثرہ افراد سے دور رہنے اور بچوں کا خاص خیال رکھنا بے حد ضروری ہے جبکہ کچی سبزیوں کا کم استعمال کرنے،میوہ دھو کر استعمال کرنا اور بازار کے کھانوں اور جنک فوڈ وغیرہ سے بھی پرہیز کرنا گیسٹرو اینٹرائٹس کی بیماری کے بچاؤ کے لیے کافی اہم ہے۔
واضح رہے گزشتہ ایک دہائی سے مضر صحت گندے پانی کی وجہ سے جموں وکشمیر میں معدے اور انتڑیوں کی سوزش کی بیماری نے کئی مرتبہ سر اٹھایا اور گزشتہ 8 برسوں کے دوران 4 مرتبہ یہ بیماری پھوٹ پڑی ہے۔کشمیر صوبے میں 2016 میں معدے اور انتڑیوں کی سوزش کے 816 معمالے سامنے آئے تھے، جبکہ 2017 میں 999 معاملات، سال 2018 میں 59 معاملات درج ہوئے۔ ایسے میں رواں برس کشمیر کے دو اضلاع میں یہ بیماری پھوٹ پڑی ہے اور 104 افراد متاثر ہوئے ہیں۔ جن میں اننت ناگ میں 89 جبکہ کولگام میں 15 معاملات سامنے آئے ہیں۔
