سری نگر: حکومت ہند کی جانب سے پروفیسر ڈاکٹر سچیدانند موہنتی کو ایمز اونتی پورہ کشمیر کا نیا ایگزیکٹیو ڈائریکٹر مقرر کیا گیا ہے۔ کابینہ کی تقرری کمیٹی ( اے سی سی ) نے ڈاکٹر سچیدانند موہنتی کی تقرری کو منظوری دے دی ہے۔ ایسے میں ڈاکٹر سچیدانند جو کہ ایمز بھونیشور کے میڈیکل سپرنٹنڈنٹ کے طور پر بھی اپنی خدمات انجام دے چکے ہیں، کو اب نئی تقرری کے تحت موصوف کو ایمز اونتی پورہ کا ایگزیکٹیو ڈائریکٹر بنایا گیا ہے۔
یہ بھی پڑھیں:
اے سی سی نے لیفٹیننٹ جنرل انوپ بنرجی کی بطور ایگزیکٹیو ڈائریکٹر، ایمس اونتی پورہ کی تقرری کو بھی منسوخ کر دیا ہے، خیال رہے کہ انوپ بنرجی کو جون 2022 میں ایمز اونتی پورہ کے پہلے ڈائریکٹر کے طور پر مقرر کیا گیا تھا تاہم وہ اس میں شامل نہیں ہوئے جس کے بعد اب ان کی تقرری کو باضابطہ طور پر منسوخ کر دیا گیا ہے۔
یاد رہے کہ سال 2016ء میں کشمیر کے اونتی پورہ اور جموں کے سامبہ میں حکومت نے 2 ایمس اداروں کو منظوری دی تھی۔ لیکن ایمس اونتی پورہ میں تعمیری کام بہت سست رفتاری سے چل رہا تھا۔ دوسری جانب عوام کے مطابق ایمس اونتی پورہ کی تکمیل سے وادیٔ کشمیر میں طب کے شعبہ میں انقلاب پیدا ہو سکے گا۔
