منڈی میں اعظم آباد تا سڑوی سڑک پر تارکول بچھانے کا کام شروع

منڈی کے اعظم آباد تا سڑوی سے محلہ خواجہ تک سڑک پر نباڑ اسکیم کے تحت تارکول بچھانے کا کام شروع کیا گیا ہے۔

منڈی:ضلع پونچھ کی تحصیل منڈی کے اعظم آباد تا سڑوی سے محلہ خواجہ تک دو کلو میٹر سڑک پر نباڑ اسکیم کے تحت محکمہ تعمیرات عامہ کے زیر اہتمام تارکول بچھانے کا کام شروع کیا گیا ہے۔ جس کا افتتاح رکن اسمبلی حویلی اعجاز احمد جان نے کیا۔

اس موقع پر متعلقہ محکمہ کے آفسران پارٹی کارکنان اور مقامی لوگ موجود رہے۔ واضع رہے سڑک پر تارکول بچھانے کا کام محکمہ تعمیرات عامہ کے "اے ای" ریاض دھکڑ اور جونیئر انجینئر ابرار ملک کی نگرانی میں کیا جارہا ہے۔ اس موقع پر مقامی لوگوں نے مسرت کا اظہار کرتے ہوئے کہا کہ اس سے قبل علاقہ میں سڑک کی ابتر حالت کے سبب عوام کو شدید مشکلات کا سامنا کرنا پڑتا تھا۔ لیکن اب سڑک پر تارکول بچھنے سے عوام کو راحت میسر ہو گی۔

اس حوالے سے رکن اسمبلی حویلی اعجاز احمد جان نے کہا کہ عوام کی مشکلات کو مدنظر رکھتے ہوئے اس سڑک پر تارکول بچھانے کا کام شروع کیا گیا ہے۔ انہوں نے کہا کہ سڑکوں کی ابتر حالت کو بہتر بنانے اور ہر علاقہ تک سڑک کی سہولیات پہنچانے کو لیکر حکومت ہر ممکن کوشش کررہی ہے۔ اس دوران انہوں نے محکمہ تعمیرات عامہ, محکمہ مال, اور محکمہ ہارٹیکلچر کو ہدایات جاری کیں کہ جن لوگوں کو ابھی تک معاوضہ فراہم نہیں کیا گیا ہے ان لوگوں کی فائلیں مکمل کرکے جلد از جلد انہیں معاوضہ دیا جائے۔انہوں نے محکمہ ہارٹیکلچر کو انتباہ دیتے ہوئے کہا کہ سست روی کو چھوڑ کر جلد از جلد جن افراد کے پیڑ وغیرہ نقصان ہوئے ہیں انہیں معاوضہ فراہم کریں۔

انہوں نے کہا کہ ہم نے عوام سے وعدہ کیا ہے جنہیں پورا کرنے کے لیے ہم ہرممکن کوشش کریں گے۔ ان کا کہنا تھا کہ حکومت بننے کے چند دنوں کے اندر ہی متعدد ترقیاتی کاموں پر کام کیا جارہا ہے۔ چونکہ 2014 کے بعد تعمیر و ترقی کا سلسلہ رک چکا تھا لیکن ایک بار پھر ترقی کا دور واپس بحال ہورہا ہے۔ انہوں نے مزید کہا کہ افسران کو سختی سے ہدایات جاری کی گئی ہے کہ جب تک تسلی بخش کام نہیں ہوگا تب تک کسی کا بھی بل واگزار نہیں کیا جائے گا۔ انہوں نے کہا کہ آنے والے وقت میں حلقہ اسمبلی انتخاب حویلی میں ترقی کے لحاظ سے بہت بڑی تیدلیاں دیکھنے کو ملیں گی۔ جس سے عوام کی مشکلات کا ازالہ ممکن ہوگا۔