پلوامہ (جموں کشمیر) : وادی کشمیر کے دیگر اضلاع کی طرح جنوبی کشمیر کے ضلع پلوامہ میں بھی سیاسی سرگرمیاں تیز ہو گئی ہیں۔ جہاں پی ڈی پی اور نیشنل کانفرنس - کانگریس اتحاد نے امیدواروں کی لسٹ شائع کر دی ہے وہیں کئی دیگر سیاسی جماعتوں نے نہ صرف امیدواروں کے نام مشتہر کر دئے ہیں بلکہ ووٹروں کو لبھانے کے لیے سیاسی انتخابی مہم بھی شروع کر دی ہے۔ عام آدمی پارٹی (عآپ) نے ضلع پلوامہ کی دو اسمبلی نشستوں پر امیدوار میدان میں اتارے ہیں۔
عآپ کی جانب سے نامزد کئے جانے کے ساتھ ہی امیدوارں نے اپنے اپنے حلقوں میں سیاسی سرگرمیاں تیز کر دی ہیں، جس دوران سیاسی لیڈران پارٹی منشور کو عوام تک پہنچانے کے لئے گھر گھر تشہیری مہم چلا رہے ہیں۔ عام آدمی پارٹی کے ایک امیدوار، مدثر حسن، نے ووٹروں کو لبھانے کی غرض سے اپنے حلقہ دربگام میں گھر گھر مہم شروع کردی ہے جس دوران انہوں نے لوگوں نے روایتی لیڈران کے بجائے انہیں اسمبلی میں مائندگی کا موقع دینے کی اپیل کی۔
مدثر حسن نے میڈیا نمائندوں کے ساتھ بات کرتے ہوئے کہا کہ ’’آج تک پی ڈی پی اور نیشنل کانفرنس کو عوام نے موقع دیا لیکن انہوں نے عوام کو راحت پہنچانے کے لئے کوئی کام نہیں کیا جبکہ عوام کو آج بھی بنیادی سہولیات سے دور رکھا گیا ہے۔‘‘ انہوں نے کہا ’’دہلی میں عآپ کی مثالی حکومت قائم ہے اور اسی طرز پر اقتدار میں آتے ہی عوام کے سبھی مسائل کو حل کیا جائے گا۔‘‘
یہ بھی پڑھیں: "مفت بجلی " کا وعدہ کشمیر کی مقامی سیاسی جماعتوں میں یکساں کیوں؟ -
