حیدرآباد: ڈمپل کپاڈیہ نے 1973 میں اپنی پہلی فلم بوبی سے بالی ووڈ میں شاندار انٹری دی۔ ان کے شاندار اور معصوم انداز نے سامعین کو مسحور کیا۔ کپاڈیہ کے اسٹائل، خاص طور پر ان کے پولکا ڈاٹڈ بلاؤز نے مداحوں میں فیشن کا جنون پیدا کیا۔ کپاڈیہ نے انکشاف کیا کہ کس طرح فلم کے ہدایت کار، لیجنڈری راج کپور نے اس فلم کے تمام ملبوسات بیرون ملک سے درآمد کیے تھے اور بڑی احتیاط کے ساتھ ان کے کردار کی نوک پلک سجائی تھی۔
میں اس وقت کسی ایسے ہدایت کار کو نہیں جانتی جو اپنی فلم کی خاتون کردار کا اتنا خیال رکھتا ہو، یہاں تک کہ اس کے بال کیسے ہوں گے، اس کے کپڑے کیسے ہوں گے... بس ایک لفظ ہے۔ جو راج کپور کو سمجھا سکتا ہے اور وہ ہے انگریزی لفظ میورک، یعنی ہٹ کر کوئی بھی کام کرنے والا شخص۔
میرے کردار سے متعلق ہر چیز انہوں نے ڈیزائن کی تھی... یہ ناقابل یقین تھا... ایک مرد ہونے کے باوجود انہوں نے یہ کیا تھا۔ ان کے پاس بہت دور اندیشی تھی اور یہ سب ان کے سنیما کے شوق کو ظاہر کرتا تھا۔ بوبی ایک مشہور فلم ہے۔ یہ ایک نوجوان جوڑے کی محبت کی کہانی ہے اور اپنے وقت سے بہت آگے ہے۔ میں فلم انڈسٹری میں اپنے تعارف کے لیے اس سے بڑے موقعے کی آرزو نہیں کرسکتی تھی۔ ڈمپل کپاڈیہ نے یہ باتیں ای ٹی وی بھارت کے ساتھ راج کپور کی پیدائش کی صد سالہ تقریبات کے پس منظر میں ہوئی ایک گفتگو کے دوران کیا۔
کپاڈیہ کے مطابق صرف بوبی ہی نہیں، ان کی تمام فلمیں شاندار رہی ہیں۔ راج صاب کے پاس رشتوں، درحقیقت باہمی تعلقات کو سمجھنے کی اتنی بڑی صلاحیت تھی اور وہ اسے خوبصورتی سے پورا کر دیتے تھے۔ ان کا ڈرامہ کا احساس ایک الگ ہی سطح پر تھا اور تفصیل کے لیے ان کا تصور نرالا اور پختہ تھا۔
کپاڈیہ اس وقت محض نوعمر تھیں جب وہ لیجنڈ کے ساتھ کام کر رہی تھیں لیکن انہیں کبھی یہ احساس ہونے نہیں دیا گیا کہ وہ سنیما کو نہیں سمجھ سکتی ہیں اور اس چھوٹی عمر میں فلم بنانے میں کن مرحلوں سے گزرنا پڑتا ہے۔ کپاڈیہ کہتی ہیں کہ وہ نئی تھیں، صرف 13 سال کی عمر تھی، اور پھر بھی وہ مجھے بٹھا کر ہارمونیم پر گانا بجاتے تھے تاکہ مجھے کردار کی باریکیوں، اس کی اہمیت اور جذبات کو سمجھا سکیں، جسے ایک گانے کی مخصوص صورت حال میں پیش کیا جانا ہو۔
انہیں یہ سب کرنے کی ضرورت نہیں تھی لیکن وہ اپنے اداکاروں پر بہت زیادہ وقت لگانے میں یقین رکھتے تھے۔ اپنے اداکاروں سے ان کی محبت اور جذبہ زبردست تھا، وہ آپ کو ایسے اونچے مقام پر چڑھا دیتے کہ آپ کو وہیں رہنا پڑتا۔۔ وہ آپ کی بہت حوصلہ افزائی کرتے تھے۔
کپاڈیہ کہتی ہیں کہ راج کپور کے ساتھ کام کرنا آسان تھا کیونکہ وہ ہر چیز کو نافذ کر دیتے ہیں اور اگر آہ ان کی ہدایات پر تقریباً 60 فیصد عمل کرکے اسے منظر پر دکھا سکتے ہیں تو یہ کافی ہوگا۔ صرف مناظر ہی نہیں، وہ سیٹ پر بھی ایک خاص انداز میں بولتے تھے، تاکہ اداکار سمجھ سکیں کہ کس انداز میں انہیں بولنا ہے۔ کپاڈیہ کہتی ہیں کہ بوبی کے بعد انہوں نے کئی فلموں میں کئی اچھے ہدایت کاروں کے ساتھ کام کیا لیکن راج کپور جیسا ہدایت کار انہیں کبھی دوسرا نہیں ملا۔
راہول راویل، جنہوں نے میرا نام جوکر میں راج کپور کے اسسٹنٹ کی حیثیت سے کام کیا، تصدیق کرتے ہیں کہ راج کپور ایک بہتر موسیقار تھے۔ "راج صاب کو خدا کی طرف سے ایک عجیب تحفہ عنایت ہوا تھا، وہ ایک جب بھی کوئی آلہ موسیقی دیکھتے تھے تو فوراً اسے لپک کر اٹھاتے تھے اور بجانا شروع کر دیتے تھے۔ الیکٹریکل کی بورڈ ابھی آئے تھے... جب ہم فلم کل آج اور کل کے بیک گراؤنڈ میوزک پر کام کر رہے تھے... وہ ریکارڈنگ کے لیے آئے، وہ دیکھتے ہی اس نئے آلے کے بارے میں جاننے کے لیے بے چین تھے۔ انہوں نے فوراً اسے اٹھا لیا اور چند منٹ میں ہی اسے بجانے لگے۔
راج کپور کے بیٹے رشی کپور نے بھی بوبی میں لیڈ کردار کے طور پر اپنا آغاز کیا۔ کپاڈیہ کا کہنا ہے کہ ان کے ساتھ جو برتاؤ کیا گیا وہ برابری کا تھا۔ ان کے مطابق رشی کپور اور ان کے درمیان کوئی فرق نہیں کیا گیا۔ درحقیقت انہوں نے اپنے بیٹے سے زیادہ مجھ پر اپنا وقت صرف کیا۔ رشی پہلے ہی ایک شاندار اداکار تھے اس لیے اس کی ضرورت نہیں تھی لیکن راج کپور نے مجھ پر بہت کام کیا۔ اس وقت، میں جس عمر میں تھی، کوئی نہیں سمجھا سکتا تھا کہ یہ کام ہے، یہ میرے لیے تو ایک پکنک جیسا تھا۔
سیٹ پر راج کپور کے سخت گیر ہونے کی بہت سی کہانیاں ہیں اور یہ کہ ان کے اداکار اور عملے کے ارکان ان سے ڈرتے تھے، تاہم، کپاڈیہ خوش قسمت تھیں کہ ان کے غصے کا سامنا نہیں کرنا پڑا۔ "وہ بالکل بھی سخت نہیں تھے۔ یہ ایک بہت اچھا رشتہ تھا جو ہم نے شیئر کیا۔ بے شک، میں ڈر گئی تھی کیونکہ یہ میرے لیے ایک نیا تجربہ تھا لیکن ڈرنے سے زیادہ، میں ان سے اس لیے خوفزدہ تھی کیونکہ وہ عمر میں کافی بڑے تھے۔
لو اسٹوری، بیٹا، ارجن، ڈکیت اور انجام کے لیے پہچانے جانے والے راویل کہتے ہیں کہ راج کپور اپنے اداکاروں پر نہ تو چیختے چلاتے تھے اور نہ ہی ناراض ہوتے تھے۔ اگر وہ کسی شاٹ سے خوش نہ ہوتے تو وہ اپنے اداکاروں کے ساتھ بہت اچھا سلوک کرتے لیکن اگر انہیں اپنے اداکاروں کی سرزنش کرنی ہوتی تو وہ ان کے بجائے اپنے اسسٹنٹ ڈائریکٹرز پر چیختے تھے۔ ان کا مقصد دوسرے شخص کو اپنے غصے سے آگاہ کرنا ہوتا تھا۔ اپنے بیٹے رشی کو تاہم وہ سب کچھ ان کے منہہ پر ہی کہہ دیتے تھے لیکن وہ دوسرے اداکاروں کے ساتھ بہت اچھا سلوک کرتے تھے۔
راویل نے بوبی، ستیم شیوم سندرم اور دھرم کرم پر راج کپور کی مدد کی۔ بیتاب کے ریلیز ہونے کے بعد میں پریم روگ کے سیٹ پر جاتا تھا اور فلم کے معاونین کے ساتھ رہتا تھا۔ میں نے سیٹ پر جو کچھ ہو رہا تھا اس کو جذب کر لیا اور اب بھی جب میں ان کی فلمیں دیکھتا ہوں تو کچھ نہ کچھ نیا سیکھنے کو ملتا ہے۔
تاہم، نو انٹری اور بھول بھلیا (دوسرا اور تیسرا ایڈیشن) کی شہرت والے ڈائریکٹر انیس بزمی جنہوں نے نوجوانی میں پریم روگ میں راج کپور کی مدد کی تھی، راویل سے اختلاف کرتے ہوئے کہتے ہیں کہ کپور نے کبھی اس بات کی پرواہ نہیں کی کہ ان کے اداکاروں، معاونین، یا عملے کے ارکان کو کیا محسوس ہوتا ہے جب وہ ان پر چلاتے ہیں۔
راج صاحب جانتے تھے کہ اگر وہ اپنے اداکاروں کو ڈانٹیں گے تو بھی انہیں برا نہیں لگے گا۔ وہ یہ برداشت کر سکتے تھے۔ جب وہ فلم کا تصور کرتے تھے تو انہیں یہ اندازہ نہیں ہوتا تھا کہ کس کو کیا اور کتنا بتانا ہے۔ وہ اپنے کام کے حوالے سے بہت ایماندار تھے اور ان کے اداکار یہ سوچ کر تناؤ میں مبتلا ہوتے تھے کہ انہیں راج کپور کو ناراض نہیں کرنا چاہیے۔ چاہے وہ رشی ہو یا ان کا سب سے چھوٹا بیٹا چمپو [راجیو] یا پدمنی ہم سب ان کی بہت عزت کرتے تھے لیکن ہمارے ذہن میں یہ خوف تھا کہ وہ ہم پر ناراض نہ ہوجائیں۔ ان کے ساتھ کام کرتے ہوئے یہ ملا جلا احساس ہمیشہ رہتا تھا۔
جب ان سے پوچھا گیا کہ کیا راج کپور ان پر کبھی چیخے چلائے ہیں تو بزمی نے کہا، "ہاں، کئی بار۔ ایک بار میں نے کچھ غلطی کی اور مجھے بتایا گیا کہ میں ان کے ساتھ ہوائی جہاز میں سفر نہیں کروں گا، لیکن میں ممبئی سے میسور کا سفر جونگا (ایک گاڑی جو پہلے ہندوستانی فوج کے زیر استعمال تھا) میں دوسرے معاونین کے ساتھ کروں گا۔ وہ سیٹ پر ایک خوفناک آدمی ہوتے تھے لیکن ساتھ ہی وہ ہم سے پیار بھی کرتے تھے۔ ہمارے ساتھ شاہی سلوک کیا جاتا۔
وہ کھانے کے شوقین تھے اور یہاں تک کہ ہمارا کھانا ہوٹل تاج سے آتا اور کم از کم 15 ڈشیں ہوتیں۔ ان کا میری زندگی میں آنے سے پہلے، میں صرف وڈا پاؤ کھاتا تھا، پہلی بار تھا جب میں نے سیپ اور لوبسٹر دیکھے تھے۔ جب ہم دوسرے ڈائریکٹرز کے معاونین سے ملتے تھے تو ہمیں بہت خاص محسوس ہوتا تھا۔ سینکڑوں واقعات ایسے ہیں جب وہ غصے میں آ جاتے اور چیخنا چلانا شروع کر دیتے تھے لیکن آج مجھے محسوس ہو رہا ہے کہ یہ سب ان کا کرم تھا۔ ہم خوش قسمت ہیں کہ ہم نے ان کے ساتھ کام کرتے ہوئے سیکھا، دوسروں نے ان کی فلمیں دیکھ کر سیکھا۔ ان کی فلمیں نصابی کتابوں کی طرح ہوتی ہیں۔ جب بھی آپ اسے دیکھتے ہیں ان کی ہر فلم ایک نیا تناظر دیتی ہے۔ وہ سامعین کی نبض کو جانتے تھے۔
تجربہ کار اداکارہ ارونا ایرانی شوق سے یاد کرتی ہیں کہ کس طرح انہیں راج کپور کی طرف سے بوبی کے لیے فون آیا جس میں انہوں نے ایک پارٹی کے سین میں رشی کپور کے کردار، چنٹو بابا کو اپنی طرف متوجہ کرنے کی کوشش کی تھی۔ "میری فلمیں جیسے کارواں اور بمبئی ٹو گوا ابھی ختم ہوئی تھیں۔ راج کپور نے مجھے اپنے آر کے اسٹوڈیو میں ملنے کے لیے بلایا۔ اس کردار کو بیان کرنے کے بعد انہوں نے کہا، 'مائنڈ یو، یہ ویمپ کا رول نہیں ہے'۔ وہ ایک جدید مفکر تھے۔
جب بات رومانس کی ہو تو کوئی بھی ان کا مقابلہ نہیں کر سکتا تھا۔ کسی بھی فنکار کے لیے ان کے ساتھ کام کرنا اعزاز کی بات ہے۔ وہ اتنے بڑے ہدایت کار تھے کہ غیر اداکاروں کو اداکاری پر مجبور کر دیتے تھے۔ وہ خود اداکاری کرتے اور ہمیں دکھاتے... وہ میرا کردار بن جایا کرتے اور سین کر کے بتاتے۔ اگر ہم ان کا 50 فیصد بھی کر سکتے ہیں جو انہوں نے ہمیں دکھایا ہے تو یہ منظر کے لئے بڑا کام ہوتا تھا۔
بوبی میرے کیریئر کا ایک اہم موڑ تھا کیونکہ اس کے بعد مجھے کافی تعریفیں اور بہت ساری آفرز ملی۔ میں نے دو شفٹوں کی شوٹنگ شروع کر دی تھی۔ ایرانی ایک واقعہ یاد کرتی ہیں جب راج کپور نے اس دن 'پیک اپ' کا اعلان کیا تھا جس دن وہ کچھ بیمار محسوس کررہی تھیں۔ "راج صاب نے ہمیشہ اس بات کا خیال رکھا کہ ان کے فنکار آرام کے ساتھ ہوں۔ ایک دن میرے سر میں درد ہوا اور انہوں نے اس دن کام بند کر دیا۔ یہ وہ دن تھا جب ہم رشی کے کردار کی سالگرہ کا سین فلما رہے تھے جب سیٹ پر بہت سارے لوگ، بہت سارے جونیئر فنکار تھے جنہیں رول کرنا تھا ۔ انہوں نے کہا، 'میں بھی ایک اداکار ہوں، آپ کو طبیعت خراب ہونے پر کام کرنے میں مزہ نہیں آتا'۔ ایرانی کے مطابق آج کی تاریخ میں کون سا فلمساز ایسا کرنے کا متحمل ہوگا۔
ستیم شیوم سندرم میں بطور چائلڈ آرٹسٹ کام کرنے کے بعد، پدمنی کولہاپوری نے رشی کپور کے ساتھ راج کپور کے بلاک بسٹر میوزیکل ڈرامہ پریم روگ (1982) میں ایک بڑی کامیابی حاصل کی۔ "وہ اپنے آپ میں ایک ادارہ تھے اور چونکہ میں نے بطور چائلڈ آرٹسٹ ان کی فلم سے شروعات کی تھی، اس لیے میرے لیے ان کا سیٹ ایک اسکول جیسا تھا۔ ظاہر ہے آپ اپنے اساتذہ سے سیکھتے ہیں، آپ ان کی تعلیمات کو جذب کرتے ہیں، اس لیے ہر چیز فطری طور پر مجھ میں سمائی تھی۔ ان دونوں فلموں کے درمیان تقریباً تین سال کا وقفہ ہے لیکن میں ان سے ان کی دیوالی، ہولی پارٹیوں میں ملتی تھی اور ان کے ساتھ مسلسل رابطہ رکھتی تھی۔
بالی ووڈ کے شو مین کے لیے اپنی گہری محبت اور احترام کا اظہار کرتے ہوئے اداکارہ کا کہنا ہے کہ وہ ان کی فلموں میں کام کرتے ہوئے فلمساز کے چھوٹے دفتر میں بیٹھ جاتی تھیں۔ "ان کا غصہ خراب تھا اور اگر کبھی وہ آپے سے باہر ہوگئے تو ہوگئے۔ لیکن وہ اپنے اداکاروں سے بہترین اداکاری کی امید کرتے تھے۔"
وہ اکثر مجھ سے بوٹ پولش، میرا نام جوکر، آوارہ جیسی پرانی فلمیں دیکھنے کو کہتے... اور پھر وہ ان فلموں کو دیکھنے کے بعد مجھ سے میری رائے پوچھتے۔ یہ ایک مناسب سیشن ہوا کرتا تھا، اس کے ارد گرد بحث ہوتی تھی۔ مجھے یاد ہے کہ پریم روگ کی کہانی میں بیوہ کی دوبارہ شادی کے موضوع پر بہت زیادہ بحث ہوئی کہ کیا لوگ اسے قبول کریں گے یا نہیں.. بعد میں دوسرے ڈائریکٹرز کے ساتھ کام کرتے ہوئے میں اس تجربے سے دور رہی لیکن میں ان کے ساتھ رابطے میں رہی اور ان کا کام دیکھتی رہی۔
جب ان کا انتقال ہوا تو وہ میرے لیے کسی سانحے سے کم نہیں تھا۔ کولہاپوری کہتی ہیں کہ کئی دہائیاں گزر چکی ہیں اور آج بھی بہت سے ہدایت کار، فلم ساز مجھ سے پوچھتے ہیں کہ راج کپور کے ساتھ کام کرنا کیسا تھا، وہ کیسے تھے... جس سے ظاہر ہوتا ہے کہ وہ انڈسٹری کے حقیقی شو مین تھے۔
