دیوریا: اتر پردیش میں دیوریا کے بارھج تحصیل کے تحت بھلوانی نگر پنچایت کے ڈومری وارڈ میں ایک بہت بڑا حادثہ پیش آیا۔ حادثے میں چار افراد ہلاک ہوگئے۔ ہفتے کی صبح پانچ بجے کے قریب چائے بنانے کے دوران، گیس سلنڈر میں آگ لگ گئی جس کی وجہ سے وہ پھٹ گیا۔ سلنڈر پھٹ جانے کی وجہ سے ایک زوردار دھماکہ ہوا۔ سلنڈر پھٹنے کے واقع کے بعد اس علاقے میں ہلچل مچ گئی۔ لوگوں نے فوراً پولیس کو اس حادثہ سے آگاہ کیا۔ اطلاع ملتے ہی جیسے ہی بہت سے عہدیدار موقعے پر پہنچ گئے اور تفتیش شروع کردی۔ حادثے میں ایک ہی خاندان کے چار افراد موقعے پر ہی دم توڑ گئے۔
جانکاری کے مطابق، ڈومری گاؤں کے رہائشی شیوشنکر گپتا پاوروٹی بیچتے ہیں۔ صبح وہ دکان پر جانے کے لئے تیار ہو رہے تھے اور ان کی اہلیہ آرتی دیوی چائے بنارہی تھیں۔ دریں اثنا، گیس کے سلنڈر سے گیس کی مہک آنے لگی اور اس نے آگ پکڑ لی، آگ لگتے ہی سلنڈر ایک زوردار آواز کے ساتھ پھٹ گیا۔ اس حادثہ کی گرفت میں آنے کی وجہ سے شیوشنکر گپتا کی اہلیہ آرتی دیوی (42 سال) ، بیٹی آنچل (14 سال) ، سرشٹی (11 ماہ) ، بیٹا کندن (12 سال) موقع پر ہی دم توڑ گئے۔ مطلع کئے جانے پر، انسپکٹر ارچانا سنگھ فورس کے ساتھ موقعے پر پہنچ گئیں۔
ڈی ایم اخند پرتاپ سنگھ، ایس پی ڈاکٹر سنکلپ شرما، ایڈیشنل ایس پی ڈاکٹر بھیم کمار گوتم، ایس ڈی ایم دِشا سریواستو، سی او آدتیہ کمار گوتم وغیرہ نے موقعے کا جائزہ لیا۔ فارنسک ٹیم بھی موقع پر پہنچ گئی۔ اتنے بڑے حادثے کی جانکاری ملنے پر لوگوں کا ہجوم جمع ہوگیا۔
ڈی ایم اکھنڈ پرتاپ سنگھ نے بتایا کہ یہ حادثہ ایل پی جی سلنڈر کے پھٹ جانے کی وجہ سے پیش آیا۔ تمام لاشوں کو پوسٹ مارٹم کے لئے بھیجا گیا ہے۔ انتظامی سطح پر متاثرہ شخص کے کنبے کی مدد کی جائے گی۔ ڈی ایم نے اس واقعے کی جانچ کا حکم دیا ہے۔
