Bike Stunts in Hyderabad : లైకుల కోసం బైకుతో స్టంట్స్.. పోలీసులు మామూలుగా ఇవ్వలేదుగా..!

Police arrest Bike stunts person in Hyderabad : హైదరాబాద్​లోని దుర్గం చెరువు కేబుల్​ బ్రిడ్జ్​పై కుర్రకారు బైక్​ స్టంట్స్​ వీడియో గత కొన్ని రోజులుగా సోషల్​ మీడియాలో వైరల్​ అవుతున్న సంగతి తెలిసిందే. సోషల్​ మీడియోలో లైకుల కోసం యువత రాత్రి సమయాల్లో చేస్తున్న ఫీట్లు అన్నీ ఇన్నీ కావు. ఇలాగే ఇటీవల తీగల వంతెన వద్ద ఓ యువకుడు స్టంట్స్ చేశాడు. ఆ దృశ్యాలు అక్కడ ఉన్న సీసీ కెమెరాల్లో చూసిన ఆ ఏరియా ట్రాఫిక్​ పోలీసులు.. వాహనం నెంబర్​ సాయంతో ఆ యువకుడిని పట్టుకున్నారు. మాదాపూర్​ పోలీస్​స్టేషన్​లో కేసు నమోదు చేశారు. అనంతరం అతనికి కౌన్సిలింగ్​ ఇచ్చి.. ఇలాంటివి ఎవరూ చేయొద్దంటూ అతడితోనే చెప్పించారు. 'నేను ఇకపై ఇలాంటి స్టంట్స్​ చేయను.. ఇతరులు కూడా ఇలా చేయవద్దని కోరుతున్నా' అంటూ సదరు యువకుడు తెలిపాడు.

సామాజిక మాధ్యమాల్లో లైకుల కోసం.. ఇతరుల ఆనందం కోసం ఇలాంటి ప్రమాదకరమైన స్టంట్స్​ చేయరాదని.. చట్టరీత్యా నేరమని ట్రాఫిక్​ పోలీసులు​ తెలిపారు. ఇలాంటి వారి వల్ల ఇతర ప్రయాణికులు ఇబ్బందులు పడతారని.. సీసీ కెమెరాల్లో ప్రతి దృశ్యం రికార్డ్​ అవుతుందని.. బైకులతో స్టంట్స్ చేసే వారిపై కఠినంగా వ్యవహరిస్తామని హెచ్చరించారు.