Negative Impacts Of Poor Sleep : ప్రస్తుత బిజీ లైఫ్‌ షెడ్యూల్స్ వల్ల.. చాలా మంది కంటి నిండా నిద్రకు దూరం అవుతున్నారు. ఉన్న కాస్త టైమ్‌లో కూడా గంటలు గంటలు సెల్‌ఫోన్‌ పట్టుకొని జాగారం చేస్తున్నారు. ఫలితంగా.. తక్కువ సమయం నిద్రపోతున్నారు. దీనివల్ల చాలా అనారోగ్య సమస్యలు వెంటాడుతాయని నిపుణులు ఎప్పటి నుంచో హెచ్చరిస్తున్నారు. అయితే, ఆరోగ్యం పాడవడమే కాకుండా.. అందం కూడా దెబ్బతింటుందని అంటున్నారు. ఈ నేపథ్యంలో.. అసలు రోజులో కనీసం ఎన్ని గంటలు నిద్రపోవాలి? కంటి నిండా నిద్ర లేకపోతే సౌందర్యం ఎలా కరిగిపోతుంది? అనే వివరాలు ఈ స్టోరీలో తెలుసుకుందాం.
ఆరోగ్యకరమైన జీవన విధానాన్ని కొనసాగించాలంటే రోజూ కనీసం 7 నుంచి 8 గంటల వరకు నిద్ర అవసరమని నిపుణులు సూచిస్తున్నారు. కానీ, చాలా మంది ఈ రోజుల్లో పని ఒత్తిడి, అనారోగ్య సమస్యలు, ఫోన్ల కారణంగా.. ఎంతో విలువైన నిద్రకు దూరం అవుతున్నారు. దీనివల్ల శరీరంలో అనేక అనారోగ్యకర మార్పులు జరుగుతాయని నిపుణులంటున్నారు. అది ముఖంపై కూడా ప్రభావం చూపిస్తుందని చెబుతున్నారు. ప్రధానంగా.. 5 చర్మ సంబంధిత సమస్యలు కనిపిస్తాయని చెబుతున్నారు.
చర్మం డల్‌గా కనిపిస్తుంది..
శరీరానికి తగినంత నిద్ర లేకపోతే చర్మం పొడిబారినట్లు ఉంటుందని నిపుణులంటున్నారు. అలాగే శరీరంలో పీహెచ్ స్థాయి దెబ్బతిని చర్మం నిస్తేజంగా కనిపిస్తుందట. దీనివల్ల తక్కువ వయస్సు ఉన్న కూడా ఎక్కువ వయస్సున్న వారిలా కనిపిస్తారట. ఎక్కువ కాలం పాటు నిద్రకు దూరమైతే ముఖంపై మొటిమలు వస్తాయి. ఇది దీర్ఘకాలికంగా కొనసాగితే చర్మంపై ముడతలు వస్తాయి.
నిద్ర రావట్లేదా? - అల్లం, అశ్వగంధతో డీప్ స్లీప్!
డార్క్ సర్కిల్స్..
నేటి కాలంలో ఎక్కువ మందిని వేధిస్తున్న సమస్యల్లో డార్క్ సర్కిల్స్ ఒకటి. కంటినిండా నిద్రలేకపోతే కళ్ల కింద డార్క్ సర్కిల్స్ వచ్చే అవకాశం ఎక్కువగా ఉంటుందని నిపుణులు హెచ్చరిస్తున్నారు. మనం నిద్రపోతున్నప్పుడు శరీరంలో దెబ్బతిన్న కణాలు అన్నీ పునరుత్పత్తి అవుతుంటాయి. అలాంటిది.. నిద్ర దూరమైతే.. అది కళ్ల కింద డార్క్ సర్కిల్స్ వచ్చేలా ప్రభావం చూపుతుందని అంటున్నారు.
కళ్ల కింద వాపు..
నిద్రను నిర్లక్ష్యం చేస్తే కళ్ల కింద వాపు రావడం, ఉబ్బినట్లుగా మారడం జరుగుతుందని నిపుణులంటున్నారు. దీనివల్ల ముఖం అందం దెబ్బతింటుంది. అలాగే కళ్లు ఎర్రబారినట్లు మారతాయని చెబుతున్నారు. ఇలాంటి లక్షణాలున్న వారు కచ్చితంగా నిద్రకు అటంకం కలగకుండా చూసుకోవాలని సూచిస్తున్నారు.
చర్మంపై ముడతలు..
మనం నిద్రపోతున్నప్పుడు శరీరంలో కొల్లాజెన్ అనే హార్మోన్ విడుదలవుతుంటుంది. ఇది చర్మం మెరవడానికి, నిగారింపు కోసం ఎంతో ఉపయోగపడుతుంది. కానీ, నిద్రకు దూరమైతే కొల్లాజెన్ హార్మోన్ ఉత్పత్తి నిలిచిపోతుంది. ఫలితంగా రక్తంలో కార్టిసాల్ స్థాయులు పెరుగుతాయని నిపుణులంటున్నారు. దీనివల్ల చర్మంపై ముడతలు ఏర్పడతాయని చెబుతున్నారు.
జుట్టు రాలిపోతుంది..
ఆరోగ్యకరమైన నిద్రను కొనసాగించకపోతే చర్మ సంబంధిత సమస్యలతో పాటు జుట్టు నిర్జీవంగా కనిపిస్తుందని నిపుణులంటున్నారు. అలాగే జుట్టు రాలడం వంటి సమస్యలు తలత్తే అవకాశం ఎక్కువగా ఉందని హెచ్చరిస్తున్నారు.
నిద్ర లేవగానే తలనొప్పి వేధిస్తోందా? - అయితే కారణాలు ఇవే!
కళ్ల కింద డార్క్ సర్కిల్స్ - నిద్ర చాలకనే వచ్చాయనుకుంటున్నారా?
