నిద్రలోనే లారీ డ్రైవర్ మృతి.. కారణం అదేనా?

డ్యూటీ అనంతరం ఇసుక లారీ పక్కకు ఆపి నిద్రించిన డ్రైవర్ తెల్లవారే సరికి మృతి చెందాడు. ఈ ఘటన యాదాద్రి జిల్లా మోత్కూరు మండలం పాటిమెట్ల గ్రామం వద్ద శనివారం చోటుచేసుకుంది. కేసు నమోదు చేసిన పోలీసులు దర్యాప్తు చేస్తున్నారు.

యాదాద్రి జిల్లా మోత్కూరు మండలం పాటిమట్ల గ్రామంలో విషాదం చోటుచేసుకుంది. జాజిరెడ్డిగూడెం వాగు నుంచి మేడ్చల్ జిల్లా జగదేవపూర్​కు ఇసుక తరలిస్తున్న లారీ డ్రైవర్ అనుమానస్పదంగా మృతి చెందాడు. చనిపోయిన వ్యక్తి తమిళనాడు రాష్ట్రానికి చెందిన కుబీరాన్​గా పోలీసులు గుర్తించారు.

రాత్రి మద్యం సేవించి స్పృహ కోల్పోయి చనిపోయాడా? లేదా గుండెపోటుతో ప్రాణాలు వదిలాడా అనేది దర్యాప్తు చేస్తున్నట్లు వెల్లడించారు. శవపరీక్ష నిమిత్తం మృతదేహాన్ని రామన్నపేట ప్రభుత్వ ఆసుపత్రికి తరలించినట్లు తెలిపారు. మృతుని బంధువులకు సమాచారం ఇచ్చామని ఎస్సై పేర్కొన్నారు.