యాదాద్రి భువనగిరి జిల్లా అడ్డగూడురు మండలం లక్ష్మీదేవికాల్వ గ్రామానికి చెందిన కొలుగూరి లక్ష్మీ.. భర్తను కోల్పోయి చాలా ఏళ్లుగా ఒంటరిగా జీవిస్తోంది. ఎవరిపై ఆధారపడకుండా కూలీ చేసుకుంటూ జీవనం సాగిస్తోంది. అలా కూలీకి వెళ్తూ రూ.5వేలు కూడబెట్టింది. ఆ డబ్బును బీరువాలో దాచుకుంది.
మూణ్నెళ్ల తర్వాత అవసరం పడి.. డబ్బు తీసుకుందామని ఆ వృద్ధురాలు బీరువా తెరిచింది. తాను దాచుకున్న ఐదు వేల రూపాయల విలువ గల నోట్లను ఎలుకలు కొరికేశాయి. బీరువాలోని దుస్తులను కూడా చించేశాయి. ఆ నోట్లను ఇరుగుపొరుగుకు చూపించగా.. అవి చెల్లవని వారు చెప్పారు. తాను ఎంతో కష్టపడి.. ఎండనకా.. వాననకా.. కూలీ చేసి ఆ డబ్బు కూడబెట్టానని.. ఇప్పుడు తన కష్టమంతా ఎలుకలు మట్టిపాలు చేశాయని వాపోయారు. అధికారులు స్పందించి.. ఆ నోట్లను బ్యాంకులో మార్పిడి చేసుకునే అవకాశం కల్పించాలని కోరుతోంది.
గతంలో రూ.2 లక్షలు
గతంలో మహబూబాబాద్ జిల్లాలోనూ ఇలాంటి సంఘటనే చోటుచేసుకుంది. ఓ రైతు తన కడుపులో పుట్టిన కణతి తొలగించుకునేందుకు సర్జరీ కోసం అప్పు చేసి పోగు చేసిన రూ.2 లక్షలు ఎలుకలు కొట్టాయి. ఆ వ్యక్తి సమస్యపై ఈటీవీ భారత్ ప్రచురించిన కథనం మంత్రి సత్యవతి రాఠోడ్ దృష్టికి వెళ్లగా.. ఆమె స్పందించారు. డబ్బుతో పాటు రైతుకు మెరుగైన వైద్యం అందేలా సాయం చేస్తానని హామీ ఇచ్చారు.
