చిన్న వయసులోనే పిల్లలు తెలివితేటలు ప్రదర్శిస్తూ రోబోలతో అద్భుత ఆవిష్కరణలు చేస్తున్నారు. వరంగల్కు చెందిన సుకన్య ఆమె స్నేహితులు పిల్లలకు రోబోటిక్స్పై మక్కువ కలిగేలా చేస్తున్నారు. బీఈ ఎలక్ట్రానిక్స్ పూర్తి చేసిన సుకన్య... చిన్నారులకు ఉపయోగపడే విధంగా ఏదైనా చేయాలని భావించారు. అందరిలా పాఠశాలలోనో, కళాశాలలో ఉపాధ్యాయురాలిగా చేయడం ఇష్టంలేదు. పిల్లలకు ఇంట్లోనే మంచి శిక్షణ ఇచ్చి.. రోబోటిక్స్పై అవగాహన పెంచవచ్చని భావించారు. ఇద్దరు బీటెక్ విద్యార్థుల సాయంతో క్రియేటివ్ రోబెటిక్స్ పేరుతో ఓ స్కూల్ ఏర్పాటు చేశారు. ఓ గదిని అద్దెకు తీసుకుని దాన్నే ప్రయోగశాలగా మార్చేశారు.
వారంలో రెండు రోజులు
రోబోటిక్స్ పరిజ్ఞానాన్ని ఏడు భాగాలుగా విభజించి విద్యార్థులకు అందిస్తున్నారు సుకన్య. శని, ఆదివారాలు మాత్రమే తరగతులు చెప్తారు. వేసవిలో నెల రోజుల పాటు ప్రత్యేక శిక్షణ ఉంటుంది. ప్రభుత్వ పాఠశాలల విద్యార్థులకు ఉచితం. పుస్తకాల్లో చదువుకున్న దానికంటే అనుభవపూర్వకంగా నేర్చుకున్నది ఎప్పటికీ మరిచిపోరని, అందుకే ప్రాక్టికల్స్కు ఎక్కువ ప్రాముఖ్యతనిస్తామని సుకన్య చెబుతున్నారు.
విద్యార్థులు ఔరా అనిపిస్తున్నారు..
శిక్షకులు అందించిన చక్కని శిక్షణతో విద్యార్థులు చిన్న వయసులోనే రోబోలు తయారు చేస్తూ ఔరా అనిపిస్తున్నారు. అంధులకు దారి చూపే విధంగా స్మార్ట్ హ్యాండ్ ఫర్ బ్లైండ్ రోబో... బెంగళూరులో జరిగిన జాతీయ స్థాయి ఇన్సెఫ్ రోబోటిక్స్ పోటీలకు ఎంపికైంది. ఇక్కడి విద్యార్థులు రూపొందించిన స్మార్ట్ డస్ట్బిన్ అందరి ప్రశంసలందుకుంది. ఫుట్బాల్ ఆడే బాహుబలి రోబోనూ విద్యార్థులు రూపొందించి అందరినీ ఆశ్చర్యపరిచారు.
శని, ఆదివారాలొచ్చాయంటే విద్యార్థులతో ఈ స్కూల్ సందడిగా మారుతుంది. సమాజానికి ఉపయోగపడేలా నూతన ఆవిష్కరణల కోసం విద్యార్థులకు శిక్షణ ఇస్తున్నారు. ఉద్యోగంలో పొందలేని సంతృప్తి పిల్లలకు రోబోటిక్స్ విజ్ఞానం అందించడం ద్వారా కలుగుతోందని, వీలైనంత ఎక్కువ మందికి శిక్షణ ఇచ్చి భావి భారత శాస్త్రవేత్తలుగా తీర్చిదిద్దడానికి తమ వంతు కృషి చేస్తున్నామని సుకన్యా, ఆమె స్నేహితులు చెబుతున్నారు.
ఇదీ చూడండి : కేసీఆర్ హామీ ఇచ్చినా... ఆగని గుర్రంగడ్డ కన్నీటి గోడు
