ఊరెళ్లి వచ్చేసరికే.. లక్షలు దోచేశారు

లాక్​డౌన్ కారణంగా స్వగ్రామానికి వెళ్లిన వ్యక్తి ఇంట్లో దుండగులు చోరీ చేశారు. రూ. 6.8లక్షల నగదును దొంగిలించి వెళ్లిన ఘటన సంగారెడ్డి జిల్లా రామచంద్రాపురంలో చోటు చేసుకుంది.

సంగారెడ్డి జిల్లా రామచంద్రాపురంలోని ఓ ఇంట్లో... ఎవరూ లేని సమయంలో తాళాలు పగలగొట్టిన దుండగులు పెద్ద ఎత్తున నగదు దోచుకెళ్లారు. ఎల్​ఐజీ క్వార్టర్ నెంబర్​ 162లో సత్యనారాయణ అనే వ్యక్తి అద్దెకు ఉంటున్నాడు. లాక్​డౌన్ సడలింపు నేపథ్యంలో ఏపీలోని తన స్వగ్రామమైన రాజోలుకు కుటుంబంతో కలిసి వెళ్లాడు.

ఇదే అదనుగా భావించిన దుండగలు అర్థరాత్రి సమయంలో నెంబర్​లేని ద్విచక్రవాహనంపై వచ్చి ఇంటి తాళాలు పగులగొట్టి బీరువాలోని 6.8లక్షల నగదును దొంగలించారు. బంగారం కూడా పోయింది అనుకున్నప్పటికీ.. వెతకగా దొరికిందని పోలీసులు తెలిపారు. దొంగలు బైక్​పై వచ్చి వెళ్లిన దృశ్యాలు సీసీ కెమెరాలలో నిక్షిప్తమయ్యాయి.

ఇవీ చూడండి: 'బోరు'న పొంగిన దుఃఖం.. బాలుడి కథ విషాదాంతం