విఘాతాలు దాటుకుని 108లోనే ప్రసవించిన మాతృమూర్తి

అడుగడుగునా విఘాతాలు ఆమెను వెంటాడాయి. తానొకటి తలిస్తే దైవమొకటి తలచినట్లయింది. ప్రసవం కోసం ప్రభుత్వ దవాఖానాకు వెళితే వైద్యులు లేరని తిరిగి పంపించేశారు. ఓ ప్రైవేటు అంబులెన్సులో వేరే ఆసుపత్రికి బయలు దేరింది. మార్గ మధ్యలో దానికి కూడా ప్రమాదం జరిగింది. ఎట్టకేలకు  108 సిబ్బంది ప్రసవం చేసి తల్లీ బిడ్డలను కాపాడారు.

సంగారెడ్డి జిల్లా సిర్గాపూర్ అంతర్గామాకు చెందిన లక్ష్మీబాయి ప్రసవం నిమిత్తం బుధవారం ఉదయం నారాయణఖేడ్ ప్రభుత్వ ఆసుపత్రికి వెళ్లింది. వైద్య సిబ్బంది లేరని సంగారెడ్డి వెళ్లాలని ఆసుపత్రి సిబ్బంది ఆమెను పంపేశారు. ఓ ప్రైవేటు అంబులెన్సులో సంగారెడ్డి ప్రభుత్వ దవఖానాకు బయలు దేరింది. మార్గ మధ్యలో ఆమె ప్రయాణిస్తున్న అంబులెన్సును ఓ పాఠశాల బస్సు ఢీకొట్టింది. చేసేదేమీ లేక 108కు సమాచారం అందించారు.

108లోనే ప్రసవం

సకాలంలో అక్కడికి చేరుకున్న 108 సిబ్బంది... ఆమెకు వాహనంలోనే సుఖ ప్రసవం చేశారు. తల్లీ బిడ్డలు క్షేమంగా బయటపడ్డారు. అనంతరం వారిని సంగారెడ్డి ప్రభుత్వాసుపత్రికి తరలించారు.

వైద్యుడేమంటున్నారంటే...

ఆసుపత్రిలో హిమోగ్లోబిన్​ లేనందున ఆమెను సంగారెడ్డికి వెళ్లవలసిందిగా సూచించామని నారాయణఖేడ్​లోని ఆసుపత్రి వైద్యుడు తెలిపారు. ఆసుపత్రిలో వైద్యుల కొరత ఎక్కువగా ఉందన్నారు.మారుమూల ప్రాంతంలోని ఏరియా ఆస్పత్రిలో వైద్య సిబ్బంది లేక రోగులు తీవ్ర ఇబ్బందులు పడుతున్నారనడానికి ఈ ఘటనే నిదర్శనం.

ఇదీ చదవండి:అయోధ్య రామునికి.. మిథిలానగరి జానకికి పెళ్లంటా!