ఫిబ్రవరి 1 నుంచి పాఠశాలలు తెరుచుకోనున్న నేపథ్యంలో సంగారెడ్డి జిల్లా పటాన్చెరు నియోజకవర్గంలో విద్యాశాఖ అధికారులు, ప్రజా ప్రతినిధులు ఇతర అధికారులతో ఎమ్మెల్యే మహిపాల్ రెడ్డి సమీక్ష నిర్వహించారు. పటాన్చెరు శివారు జీఎంఆర్ కన్వెన్షన్ సెంటర్లో నిర్వహించిన ఈ సమావేశంలో అధికారులకు, ప్రజా ప్రతినిధులకు మహిపాల్ రెడ్డి పలు సూచనలు చేశారు.
వారిలో నమ్మకం కల్పించండి..
స్థానిక ప్రజా ప్రతినిధుల సహాయంతో తరగతులు నిర్వహించేందుకు... అనుకూలంగా పాఠశాలలను సిద్ధం చేయాలని ఎమ్మెల్యే అధికారులకు తెలిపారు. వేలాది మంది విద్యార్థులు ప్రత్యక్షంగా తరగతులకు హాజరు అవుతారని.. నిబంధనలు అమలు చేస్తూ పాఠశాలలో సురక్షితమన్న భావన తల్లిదండ్రుల్లో కల్పించాలన్నారు.
తనిఖీలు తప్పనిసరి..
విద్యార్థులకు ప్రతిరోజు థర్మామీటర్తో తనిఖీ చేసి, విధిగా మాస్కు ధరించి, శానిటైజర్తో చేతులు శుభ్రం చేసుకునేలా చూడాలన్నారు. నియోజకవర్గంలో 160 పాఠశాలకు తన సొంత నిధులతో 9, 10 తరగతుల విద్యార్థులకు రెండు మాస్కులు, శానిటైజర్, పాఠశాలకు థర్మామీటర్ అందజేస్తున్నట్లు తెలిపారు.
జిన్నారం మండలంలోని పాఠశాలకు తాగునీటి సమస్య తీర్చాలని, భోజనం చల్లారకుండా హాట్ బాక్స్ లో అందజేసేలా చూడాలన్నారు. ఏ విద్యార్థికైనా జ్వరం అనారోగ్య సమస్యలు తలెత్తితే వెంటనే స్థానిక ప్రభుత్వ వైద్యాధికారులకు తెలియజేయాలని సూచించారు. పాఠశాల సమయాలకు అనుగుణంగా ఆర్టీసీ బస్సులు నడపాలన్నారు.
కొవిడ్ మార్గదర్శకాలకు అనుగుణంగా తరగతులు నిర్వహిస్తామని జిల్లా విద్యాధికారి రాజేష్ తెలిపారు. తల్లిదండ్రులు ఎలాంటి అనుమానాలు పెట్టుకోకుండా పిల్లలను ధైర్యంగా పాఠశాలకు పంపాలని కోరారు.
ఇదీ చూడండి: ఉత్తర, దక్షిణ భారత్కు వారధిగా హైదరాబాద్: కేటీఆర్
