నిజామాబాద్ మార్కెట్లో పసుపు రైతుల కష్టాలు కొనసాగుతూనే ఉన్నాయి. సీజన్ ప్రారంభంలో క్వింటా పచ్చ బంగారానికి ఐదు వేలు పలికింది. సీజన్ ముగింపులో ధర పెరుగుతుందని ఆశతో కొందరు రైతులు పసుపు నిల్వచేసుకుని మార్కెట్ యార్డుకు తీసుకురాగా రూ. 1500 మాత్రమే పెరిగింది. కనీసం రూ. 10 వేలు పలుకుతుందనుకున్న అన్నదాత ఆశలు అవిరయ్యాయి.
ఎకరాకు లక్ష
పచ్చ బంగారం రోజురోజుకు కాంతిహీనం అవుతోంది. పెరిగిన పెట్టుబడి ఖర్చులు తడిసి మోపెడవుతున్నాయి. సంవత్సరానికి ఎకరా పసుపు సాగుకు లక్ష ఖర్చు అవుతుంది. అన్ని భరించి మార్కెట్కు వెళ్తే అక్కడి వర్తకులు రైతులకు చుక్కలు చూపిస్తున్నారు. నాణ్యత లేదంటూ తక్కువ ధరకు కొనుగోలు చేస్తూ రైతులను నిలువునా దోచుకుంటున్నారు.
ఏపీ నుంచి
నిజామాబాద్ వ్యవసాయ మార్కెట్కు ఇతర రాష్ట్రాల నుంచి కూడా పసుపు పంట తరలి వస్తోంది. ఆంధ్రప్రదేశ్లోని కర్నూలు జిల్లా నంద్యాల రైతులు పచ్చ బంగారం తీసుకొచ్చి విక్రయిస్తున్నారు. అక్కడి వ్యవసాయ మార్కెట్లో పసుపు క్విటాకు రూ. 4 వేలు పలకడం వల్ల వెయ్యి మిగులుతాయని ఇంత దూరం వచ్చామని అన్నదాతలు తెలిపారు. వచ్చే పంటకైనా ప్రభుత్వం కనీస మద్దతు ధర ప్రకటించాలని రైతులు కోరుతున్నారు. పసుపు బోర్డు ఏర్పాటు చేయాలంటున్నారు.
