10th Class Girl Suicide in Nizamabad : పదో తరగతి బాలిక ఆత్మహత్య.. ప్రేమించి మోసపోయానంటూ సూసైడ్ నోట్

10th Class Girl Suicide in Nizamabad : నిజామాబాద్​ జిల్లాలో విషాదం చోటుచేసుకుంది. ప్రేమ పేరుతో యువకుడు మోసం చేశాడని మనస్తాపం చెందిన ఓ పదో తరగతి విద్యార్థిని బలవన్మరణానికి పాల్పడింది. సూసైడ్​ నోట్​ రాసి ప్రాణాలు తీసుకుంది. అనుమానాస్పద మృతిగా కేసు నమోదు చేసుకున్న పోలీసులు.. దర్యాప్తు ప్రారంభించారు.

10th Class Girl Suicide in Nizamabad : నేటికాలంలో కొంతమంది యువత ప్రేమ​ పేరుతో.. తమ బంగారంలాంటి భవిష్యత్తును ఆగం చేసుకుంటున్నారు. తెలిసీ తెలియని వయసులో ఆకర్షణను.. ప్రేమ అనుకుని మోసపోతున్నారు. పట్టుమని 18 ఏళ్లూ రాకముందే.. 10వ తరగతి కూడా పూర్తి కాని విద్యార్థులు.. తమ సోల్​మేట్​ దొరికేసిందంటూ చెట్టాపట్టాలేసుకుని తిరిగేస్తున్నారు. ఈ క్రమంలో జరగాల్సిన నష్టం జరిగాక గానీ.. వారు ఆ మత్తులో నుంచి బయటకు రాలేకపోతున్నారు.

తమది ప్రేమ కాదు.. కేవలం ఆకర్షణే అన్న వాస్తవాన్ని ఆలస్యంగా గ్రహిస్తున్నారు. ఈ ఆలస్యం కొన్నిసార్లు ప్రాణాల మీదకు తెస్తోంది. నమ్మిన వాడు శారీరకంగా వాడుకుని నట్టేట ముంచేశాక.. అటు ఇంట్లో చెప్పలేక, ప్రేమించిన వాడిని ఏమీ అనలేక ఎంతోమంది ఉసురు తీసుకుంటున్నారు. ఇలాంటి వారిలో ఎక్కువ మంది మైనర్లే ఉంటుండటం గమనార్హం. తాజాగా నిజామాబాద్​ జిల్లాలో ఇలాంటి ఓ ఘటనే వెలుగులోకి వచ్చింది. ప్రేమ పేరుతో ఓ యువకుడు మోసం చేశాడని మనస్తాపం చెందిన ఓ పదో తరగతి విద్యార్థిని బలవన్మరణానికి పాల్పడింది. స్థానికులు, పోలీసులు తెలిపిన వివరాల ప్రకారం..

నిజామాబాద్​ జిల్లా అర్సపల్లికి చెందిన.. మేకల నాగరాజు-సునీత దంపతులు కూలీ పనులు చేస్తూ జీవనం సాగిస్తున్నారు. వీరికి శ్రీకాంత్​, శ్రీలత (16) సంతానం. కుమార్తె శ్రీలత ప్రస్తుతం 10వ తరగతి చదువుతోంది. ఇటీవల ఆమెకు కళ్ల కలక రావడంతో శనివారం రోజున పాఠశాలకు వెళ్లకుండా.. తల్లితో కలిసి ఇంటి వద్దే ఉంటోంది. ఈ క్రమంలో కూరగాయలు తీసుకురావడానికి తల్లి సునీత నిజామాబాద్​కు వెళ్లగా.. ఇంట్లో ఎవరూ లేని సమయం చూసి చున్నీతో దూలానికి ఉరి వేసుకుని బలవన్మరణానికి పాల్పడింది.

ఇంటికి తిరిగొచ్చిన సునీత.. ఇంటి తలుపులు తెరిచి చూడగా దూలానికి వేలాడుతూ కనిపించింది. ఊహించని ఈ పరిణామంతో కంగుతిన్న తల్లి.. లబోదిబోమంటూ గుండెలు బాదుకుంది. గమనించిన స్థానికులు అక్కడికి చేరుకుని శ్రీలతను దూలం నుంచి కిందకు దించారు. అయితే అప్పటికే బాలిక ప్రాణాలు విడిచింది. అప్పటి వరకు తనతో నవ్వుతూ, ఆనందంగా గడిపిన తన గారాల పట్టీ.. అంతలోనే విగతజీవిగా మారడంతో ఆ తల్లి రోదనలు మిన్నంటాయి.

ప్రేమ పేరుతో ఓ యువకుడు మోసం చేయడంతో మనస్తాపం చెంది ఆత్మహత్య చేసుకుంటున్నట్లు బాలిక రాసిన సూసైడ్​ నోట్​ను కుటుంబసభ్యులు గుర్తించారు. స్థానికుల సమాచారం మేరకు విషయం తెలుసుకున్న పోలీసులు ఘటనా స్థలానికి చేరుకున్నారు. మృతదేహాన్ని పోస్టుమార్టం నిమిత్తం నిజామాబాద్ జిల్లా ప్రభుత్వ ఆసుపత్రికి తరలించారు. తల్లి సునీత ఫిర్యాదు మేరకు అనుమానాస్పద మృతిగా కేసు నమోదు చేసుకుని దర్యాప్తు చేస్తున్నారు.

Suicide Letter