రాష్ట్ర వ్యాప్తంగా న‌గ‌రాలు, ప‌ట్ట‌ణాల‌కు చేరువ‌లో ఉన్న అటవీ బ్లాకులను.. అర్బన్ పార్కులు, లంగ్ స్పేస్ కేంద్రాలుగా ఏర్పాటు చేస్తున్నామని అటవీ, పర్యావరణ శాఖ మంత్రి ఇంద్రకరణ్ రెడ్డి అన్నారు. నిర్మల్ జిల్లా ఖానాపూర్ ప‌ట్టణానికి స‌మీపంలోని మస్కాపూర్ బీట్లో హ‌రిత‌వ‌నం(అర్బన్ ఫారెస్ట్) పార్కు ఏర్పాటుకు మంత్రి భూమి పూజ చేశారు. 225 హెక్టార్ల‌లో రూ.8.50 కోట్ల వ్య‌యంతో పార్కును ఏర్పాటు చేస్తున్నట్లు మంత్రి తెలిపారు.
ఆహ్లాదాన్ని కలిగించేలా..
ఉమ్మ‌డి ఆదిలాబాద్ జిల్లాలోని మావ‌ల, నిర్మల్, ఆసిఫాబాద్ ప‌ట్ట‌ణాల‌కు స‌మీపంలో ఇప్ప‌టికే అర్బన్ ఫారెస్ట్ పార్కులు ప్రారంభమయ్యాయని మంత్రి పేర్కొన్నారు. ఈ పార్కుల్లో వారాంతాలు, సెలవు రోజుల్లో ప్రజలు ప్రశాంతంగా గడిపేందుకు ఆసక్తి చూపుతున్నార‌ని వెల్లడించారు. ఆట‌విడుపు కోసం పిల్లలకు ఆటస్థలం, పెద్దలకు వాకింగ్, సైక్లింగ్, ప‌గోడాలు, క‌నోఫి వాక్, లోట‌స్ పాండ్, వాచ్ ట‌వ‌ర్ చుట్టూ ఫెన్సింగ్, బంధుమిత్రులతో వనభోజనాలు చేసుకునేలా.. ఈ అటవీ ఉద్యానవనాన్ని తీర్చిదిద్ద‌నున్నామని పేర్కొన్నారు. ఈ కార్య‌క్ర‌మంలో క‌లెక్ట‌ర్ ముషారఫ్ ఫారూఖీ, ఎమ్మెల్యే రేఖా శ్యాంనాయ‌క్, జ‌డ్పీ ఛైర్ప‌ర్స‌న్ కొరిపెల్లి విజ‌య‌ల‌క్ష్మి, ఇతర ప్రజాప్రతినిధులు తదితరులు పాల్గొన్నారు.
ఇదీ చదవండి: పెరుగుతున్న ధరలకు ఎవరు బాధ్యులు: కేటీఆర్
