జానారెడ్డికి సీఎం అయ్యే అవకాశం ఎప్పుడూ రాలేదు: గుత్తా

నాగార్జున సాగర్​ ఉపఎన్నికల ప్రచారంలో కాంగ్రెస్​ నాయకులు ఏం మాట్లాడుతున్నారో వారికే అర్థం కావడం లేదని శాసన మండలి ఛైర్మన్​ గుత్తా సుఖేందర్ రెడ్డి ఎద్దేవా చేశారు. పెదాలపై సానుభూతి, కులాల పేర్లతో ఓట్లు తెచ్చుకోవడం ఆ పార్టీకి అలవాటేనని ఎద్దేవా చేశారు. ఈ మేరకు ఆయన నల్గొండలోని తన నివాసంలో విలేకరుల సమావేశం నిర్వహించారు.

హాలియా బహిరంగ సభలో సీఎం కేసీఆర్​.. నెల్లికల్ ప్రాజెక్ట్, కుంకుడు చెట్టు తండా ప్రాజెక్టులు మంజూరు చేయడం పట్ల శాసన మండలి ఛైర్మన్​ గుత్తా సుఖేందర్​ రెడ్డి హర్షం వ్యక్తంచేశారు. డిగ్రీ కళాశాల నిర్మాణానికి రాష్ట్ర ప్రభుత్వం అన్ని అనుమతులు ఇచ్చిందనీ.. ఏ సమస్యను సీఎం దృష్టికి తీసుకెళ్లినా వాటిని వెంటనే పరిష్కరిస్తున్నారని అన్నారు. నల్గొండ జిల్లా కేంద్రంలోని ఆయన నివాసంలో ఛైర్మన్​ మీడియా సమావేశం నిర్వహించారు.

అందుకే స్పందించా..

జానారెడ్డి ముఖ్యమంత్రి పదవి త్యాగం చేశానని చెప్పుకోవడం.. ఆయన భిక్ష వల్లే కేసీఆర్ ముఖ్యమంత్రి అయ్యారనడం హాస్యాస్పదంగా ఉందని గుత్తా అన్నారు. ఆయనకు ముఖ్యమంత్రి అయ్యే అవకాశం ఎప్పుడూ రాలేదని స్పష్టం చేశారు. ప్రచారంలో రేవంత్​ రెడ్డి ఏం మాట్లాడుతున్నారో ఆయనకే అర్థం కావడం లేదని ఎద్దేవా చేశారు. శాసన మండలి ఛైర్మన్​ హోదాలో ఉన్నప్పటికీ తనపై విమర్శలు చేస్తున్నారని.. అందుకే తాను స్పందించాల్సిన అవసరం వచ్చిందని స్పష్టం చేశారు. జానారెడ్డి ఆయన ఇద్దరు కుమారులతోనే ఇబ్బందులు పడుతుంటే.. మళ్లీ ఉత్తమ్​ కుమార్​ రెడ్డి పెద్ద కొడుకు, కోమటిరెడ్డి వెంకట్​ రెడ్డి చిన్న కొడుకు అని చెప్పుకోవడం విడ్డూరంగా ఉందని అన్నారు. వీళ్లంతా కలిసి ఆయనను ముంచేలా ఉన్నారని వ్యాఖ్యానించారు. సాగర్ ఉపఎన్నికల్లో ప్రజలు తెరాస గెలుపును కోరుకుంటున్నారని వెల్లడించారు.

ఇదీ చదవండి: 'కనీసం 17 వేల మెజారిటీతో జానారెడ్డి విజయం సాధిస్తారు'